Politika Basha: Rama kontrollon drejtësinë e Durrësit përmes Dakos

Basha: Rama kontrollon drejtësinë e Durrësit përmes Dakos

Një ditë pasi Valbona Sako është regjistruar si kryebashkiake e Durrësit nga gjyqtari i gjykatës së shkallës së parë të këtij qyteti, Shpëtim Reka, Kryedemokrati Lulzim Basha akuzoi Kryeministrin Edi Rama se kontrollon drejtësinë në qytetin bregdetar përmes kryebashkiakut Vangjush Dako.

“Edi Rama përmes Vangjush Dakos dhe krimit të organizuar kontrollon pushtetin lokal, drejtësinë dhe çdo institucion tjetër të Durrësit. Bashkëpunëtori i bandës kriminale të Avdylajve, liruesi nga burgu i Lul Berishës dhe pastruesi i parave të krimit në Durrës, duhet të ishte në burg, por ai është padroni i atyre që që duhet ta dërgonin në burg.”

Basha tha se drejtësia në të gjithë Shqipërinë është sot në duart e krimit dhe të organizatës kriminale të rilindjes. “Sot mes rilindasve dhe krimit nuk ka më asnjë ndryshim. Jemi kthyer në kohët e errëta, kur drejtësia ishte partia kriminale.”

Kryedemokrati tha se me këtë drejtësi nuk do ketë kurrë politikanë në pranga, nuk do ketë kurrë kriminelë në burg. “Me këtë drejtësi, prangat janë për njerëzit e thjeshtë dhe krimi e hajdutëria qeveritare bëjnë kërdinë. Çlirimi i vendit nga sundimi i Edi Ramës dhe bandës së tij në qeveri është domosdoshmëri për demokracinë, shtetin e së drejtës dhe stabilitetin e vendit.”