Kryetari i PD-së, Sali Berisha deklaroi sot se “vjeshta e parë do jetë periudha e fillimit të primareve për kandidaturat tona për kryetarët e bashkive”.
Berisha paralajmëroi protesta ndaj qeverisë, duke u shprehur se ato janë në rendin e ditës.
“Unë në një takim që zhvillova me kryetarët e degëve, kërkova një veprimtari shumëplanëshe, sepse PD-ja nuk mund të qëndrojë në një lloj veprimtarie. Koha e thërret atë të ketë një aktivitet shumëplanësh. Protestat janë dhe mbeten në rendin e ditës të kësaj partie. Kjo jashtë çdo lloj dyshimi. PD-ja duhet të shfrytëzojë çdo lloj potenciali për objektivat e saj”, tha Berisha.
Sipas tij, vendi është në krizë, nga e cila po përfiton Edi Rama.
“Nuk janë çmime tregu këto, janë çmime të shushunjave të importuara nga koha e komunizmit, që asgjësojnë institucionet ligjore të ngarkuara për t’i dhënë përgjigje spekulimeve. Kjo sepse Edi Rama me njerëzit e tij janë përfituesit kryesorë të rritjes së çmimeve”, tha Berisha.
