Sali Berisha në konferencën e jashtëzakonshme nga selia blu ka mohuar akuzat e ngritura ndaj tij nga SPAK Berisha e ka konsideruar drejtësinë si të “kapur” nga pushteti dhe akuzon se akuzat ndaj tij janë të orkestruara nga rivali i tij, Edi Rama.
“Edi Rama, pasi ka grabitur në mënyrë suksesive votën e shqiptarëve dhe eliminoi pluralizmin politik në parlament, pasi u damkos nga qytetarët e Kosovës si vëllau i Vuçiçit, nga opozita si argat i Beogradit, nga bota si Pashiçi shqiptar, dhe pas fillimit të lëvizjes opozitare pa kthim dje në parlamentin e Shqipërisë, ai urdhëroi prokurorët e tij mercenarë, të denoncuar publikisht në këtë sallë, për fshehje dokumentesh, për manipulim dosjesh, për bashkëpunim me krimin dhe bandat, për të lëshuar urdhër në kundërshtim me Kushtetutën, nenin 73 të saj, i cili përcakton se liria e deputetit në çdo formë, lëvizje, nuk mund të cenohet pa miratimin e parlamentit. Por, duke qenë autor i një propozimi të tillë në vitin 2012, që ky nen të hiqet, unë pranoj plotësisht sfidën”, tha fillimisht Berisha.
Berisha nënvizon se nuk do të tërhiqet as përballë kësaj sfide dhe shton se bëhet fjalë vetëm për një akuzë me prapavijë politike, në të cilën është implikuar edhe arrestimi i dhëndrit të tij, Jamarbër Malltezi. Për këtë të fundit, ai tha se nuk është thirrur kurrë nga as një prokuror apo gjykatës. Ai nënvizon se prej tre vitesh SPAK ka hetuar mbi çështjen e privatizimit të kompleksit “Partizani”, por nuk kanë mundur të gjejnë asgjë që mund të përfshijë në një aferë korruptive atë apo dhëndrin e tij.
Ish-kryeministri theksoi se ka sot më shumë se kurrë mbështetjen e votuesve të tij dhe asnjë akuzë nuk do e ndalojë përballë atij që i referohet si regjim i kryeministrit Rama.
“Pra, as kufizimi im për të lëvizur në Shqipëri, unë jam deputet dhe duhet të takohem me zgjedhësit, të cilët sot ndjehen më Sali Berishë se kurrë. As kufizimi im për të lëvizur në Europë, nuk mund të ndodhte kurrë pa miratimin e komisioneve parlamentare. Por në vendin ku prokuroria është thjesht një seksion i PS, mund të merret çdo vendim”, tha Sali Berisha ndër të tjera.
“Këto masa dhe çdo masë tjetër, e karakterit strikt politik, vetëm sa shumëfishojnë motivimin e Sali Berishës, bashkëpunëtorëve të tij dhe qindra e mijëra anëtarëve dhe simpatizantëve në betejën e tyre pa kthim që nisën dy ditë më parë në parlamentin shqiptar. Në betejën kundër regjimit të Edi Ramës, ndjehem jo më pak i motivuar se 32 vite më parë, në kohën e betejës kundër etërve të tij mizore.
Dhe së shpejti, Sali Berisha, opozita shqiptare, mbështetësit e saj, do i rezervojnë Edi Ramës, fatin e etërve të tij xhelatë”, tha Berisha.
