Mijëra besimtarë myslimanë kanë mbajtur mëngjesin e sotëm faljen me rastin e Kurban Bajramin.
E cilësuar si një ndër festat më të rëndësishme të kalendarit islam, edhe këtë herë falja e Kurban Bajramit është kryer në sheshin Skënderbej, i cili u mbush nga qindra qytetarë
Ceremonisë së faljes i parapriu me fjalën e tij Kreu i Komunitetit Mysliman, Spahiu i cili përcolli mesazhin për më shumë paqe, mirësi, respekt e dashuri ndaj njeri-tjetrit dhe sidomos për më tepër besim, duke e konsideruar njeriun si pasurinë më të madhe të krijuar nga Zoti.
“Të bëhemi më të fortë ndaj besimit, ndaj Zotit. Më të dashur e më solidarë me njëri tjetrin. T’u shtrijmë dorën e ndihmës atyre që kanë më shumë nevojë. I lutem Zotit që në botë të mbizotërojë paqja dhe prosperiteti mes popujve”, tha Spahiu.
Sipas tij kjo është festa e të gjithëve, për të kaluar më shumë kohë me familjen, fëmijët, të afërmit e fqinjët, për të përcjellë tek gjithsecilin mirësitë që jep Allahu i Madhërishëm.
Një mesazh në këtë ditë e pati edhe për shqiptarët e Kosovës
“I lutem Zotit që vëllezërit dhe motrat tona në Kosovë të gjejnë durimin dhe maturinë e duhur për të përballuar situatat e fundit të tensioneve dhe provokimeve në Veri të Kosovës”, tha kreu i KMSH-së.
