Instituti i Statistikave të Britanisë së Madhe ka përditësuar shifrën e viktimave që kanë vdekur me COVID-19. Dhe është një bilanc tragjik.
Sipas të dhënave, që përfshijnë edhe raste jo plotësisht të konfirmuara, por shumë të dyshuara, personat që kanë ndërruar jetë nga pandemia në atë vend tejkalojnë 47 mijë personat, pikërisht 47343, 42173 prej tyre në Angli dhe Uells.
Një pjesë e të dhënave vijnë nga azile dhe institucione private që nuk kishin arritur të përditësonin të dhënat në mënyrë sistematike në javët paraardhëse.
Kjo shndërron Britaninë e Madhe në vendin me bilancin më të lartë në Europë dhe i dyti në botë pas Shteteve të Bashkuara, që po i afrohen bilancit të 100 mijë viktimave.
