Pas humbjes ndaj Milanit në kampionat dhe Bayernit në Champions, Inter kthehet të fitojë dhe një gjë të tillë e bën me vuajtje.
Në ndeshjen e zhvilluar në San Siro ndaj Torinos, goli i vetëm i takimit për zikaltërit erdhi vetëm në minutën e 89, kur Barella dha një top fantastik për Brozovic brenda zonës, me mesfushorin kroat që mposhti portierin Milinkovic-Savic.
Për t’u nënvizuar ndeshja fantastike e portierit të Interit, Samir Handanovic, i cili pas kritikave në derbi, u la në stol nga trajneri Simone Inzaghi për supersfidën ndaj Bayern Munchen.
Me këtë fitore, Inter ngjitet në kuotën e 12 pikëve dhe për momentin renditet në vendin e tretë të Serisë A.
