Për shumë mund të duket e çuditshme, por sipas një studimi që ka dokumentar mendimet e vendeve më të zhvilluara të botës rreth Amerikës, ekonomitë më të zhvilluara janë të pakënaqura me gjendjen aktuale të demokracisë në ‘tokën e ëndrrave’.
Në sytë e ekonomive të avancuara, SHBA shihet pozitivisht për teknologjinë, industrinë e argëtimit, ushtrinë dhe universitetet por negativisht për sistemin shëndetësor, diskriminimin dhe gjendjen e demokracisë.
Studimi i kryer nga PEW Research Center ka dokumentar reputacionin global që gëzojnë Shtetet e Bashkuara, duke vënë re një ndryshim drastik gjatë 2 dekadave të fundit, që ulet e bie në varësi të kujt drejton Shtëpinë e Bardhë si dhe politikave të jashtme që ata ndjekin.
Në të njëjtën kohë, shumë faktorë kanë vazhduar të ndikojnë në mënyrën si SHBA shihet nga të tjerët, përfshi shtrirjen e kulturës amerikane nëpër botë, modelin ekonomik si dhe politikat e saj përçarëse.
Një studim i 17 vendeve më të zhvilluara në botë dëshmon për kompleksitetin e Shteteve të Bashkuara, por edhe problemet e shumta që ata kanë. Në fakt, vetë Amerikanët shohin pika të forta por edhe të dobëta në shoqërinë e tyre.
Pozitivet
Elementët më pozitivë të imazhit të Amerikës në botë janë të lidhura më së shumti me eksportet e tyre të famshme si teknologjia dhe kultura mediatike.
72% vlerësojnë teknologjinë amerikane të përqendruar në Silicon Valley si më të mirën ose mbi mesataren, dhe sigurisht 71% vlerësojnë industrinë e filmave dhe televizionit, me shtëpi në Hollywood.
Një mesatare tjetër prej 45% vlerëson kapacitetin ushtarak të amerikanëve, dhe së fundmi universitet amerikane vlerësohen si më të mirat nga 16% dhe mbi mesataren nga 43% e 16 ekonomive më të forta në botë si Kanadaja, Gjermania, Franca etj.
Negativet
Sidoqoftë, këndvështrimet për sa i përket standardit të jetesës amerikane janë mikse. Në shumicën e vendeve, pjesa më e madhe e pjesëmarrësve në sondazh e quajnë nivelin e jetesës në Amerikë mesatar, edhe pse 50% e vendeve si Greqia, Spanja, Koreja e Jugut dhe Tajvani e quajnë atë mbi mesataren.
Në Suedi, Holandë dhe Australi, më tepër se 40% mendojnë se niveli i jetesës në SHBA është nën mesataren ose i ulët.
Sistemi shëndetësor në SHBA ka marrë sigurisht një notë tepër të ulët nga ekonomitë më të mira botërore.
Një mesatare prej 48% mendojnë se është nën mesataren ndërsa 18% mendojnë se është më i keqi ndër vendet e zhvilluara.
Çështja e diskriminimit shihet gjithashtu me rezerva nga vendet e zhvilluara, shumë prej të cilëve mendojnë se SHBA është vendi i zhvilluar me nivelin më të lartë të diskriminimit.
Qytetarët me prirje të majta sidomos kanë tendencën të mendojnë se diskriminimi është një problem serioz në SHBA. Për shembull, 81% e kanadezëve të majtë e mendojnë këtë në krahasim me vetëm 66% e kanadezëve me prirje në qendër dhe 52% të kanadezëve të djathtë.
Sistemi politik dhe liria
Për sa i përket sistemit politik në SHBA, vendet e zhvilluara janë të ndara – 50% mendojnë se funksionon mirë ndërsa 48% e kundërshtojnë këtë. Vlerësimet variojnë gjerësisht, duke nisur nga 80% në Korenë e Jugut që mendojnë se sistemi politik amerikan është pozitiv deri tek Zelanda e Re, ku vetëm 30% e mendojnë këtë.
Sidoqoftë, vetëm 17% e vendeve të zhvilluara mendojnë se demokracia amerikane është një shembull i mirë për t’u ndjekur nga shtetet e tjera.
Shumicë mendojnë se demokracia amerikane ka qenë dikur një shembulli mirë por në vitet e fundit, ky sentiment është zbehur.
Ndërkohë, një mesatare prej 23% mendojnë se demokracia amerikane nuk ka qenë kurrë një shembull i mirë apo që ja vlen të ndiqet nga të tjerët.
Gjithsesi, rreth 50% e vendeve të zhvilluara duket të kenë rënë dakord me faktin se qeveria amerikane i respekton liritë personale të qytetarëve të saj, edhe pse një minorancë e konsiderueshme nuk e ndajnë këtë mendim në vende si Australia dhe Zelanda e Re, ku rreth 40% mendojnë se liritë personale të amerikanëve nuk respektohen aspak.
