Mjeku anestezist dhe kreu i Shoqatës së Anestezistëve dhe Reanimatorëve të Shqipërisë, Mihal Kerci ka ndërruar jetë.
Kerci prej ditësh ishte prekur nga COVID dhe ishte duke luftuar me virusit, por në fund nuk mundi të fitonte dot betejën me të.
Shoqata e Anestezistëve dhe Reanimatorëve të Shqipërisë ka bërë publik lajmin e trishtë. “U prehtë në paqe Prof. Mihal Kerci!”, është ky një reagim nga shoqata ku jepet lajmi i trishtë.
Ministrja e Shëndetësisë, Ogerta Manastirliu, në një postim në Facebook shkruan kështu për mjekun Kërci:
“Prof. Mihal Kërcin e takova ditën kur iu bashkua task forcës së anestezistëve, e cila u krijua në fillimin e epidemisë në vendin tonë, së bashku me prof. Roland Xhaxhon dhe prof. Sokol Agollin.
Në muajt e punës me task forcën e ngritur, ku mjekët e shkëlqyer të anestezi-reanimacionit që iu përgjigjën situatës, vlerësonin nevojat, planifikonin hapat që duhet të hidhnim, me qëllim që virusi të mos na gjente të papërgatitur, rivendosnin në punë respiratorë në shërbimet tona spitalore, organizonin trajnimet me të rejat e fundit, prof. Kërçi luajti një rol të rëndësishëm sa profesional aq dhe njerëzor, në mbështetje të planit tonë në luftën kundër Covid19.
Lajmi që prof. Kërçi nuk ia doli në luftën e tij për jetën, më hidhëroi shumë.
Mjekësia shqiptare humbi një prej profesionistëve më të zotë.
Në këto momente dhimbjeje, i shpreh ngushëllimet e sinqerta familjes, kolegëve dhe miqve të dr. Mihalit.
U prehsh në paqe prof. Kërçi”.
