Universiteti Harvard dhe Instituti i Teknologjisë në Masaçusets sfidojnë ligjërisht administratën amerikane për vendimin kundër studentëve të huaj.
Në një udhëzim të fundit, Agjencia e Shteteve të Bashkuara për Emigracionin kërkon që ata që vijnë nga jashtë të kthehen në vendet e origjinës nëse të gjitha mësimet mund t’i marrin online. Madje, Departamenti i Shtetit bëri me dije se nuk do të lëshojë viza dhe se do të anulonte ato ekzistuese nëse studentët e huaj nuk e kanë të nevojshme praninë në kampuse. Por, dy universitetet prestigjioze kanë ngritur një padi duke kërkuar bllokimin e urdhrit pasi është në shkelje të kushtetutës.
“Urdhri erdhi pa asnjë paralajmërim. Duket se është ndërtuar me qëllim për të vendosur nën presion kolegjet dhe universitetet për të hapur sallat e mësimit në kampus këtë vjeshtë pa marrë parasysh shqetësimin për shëndetin dhe sigurinë e studentëve, stafit akademik dhe të tjerëve”, tha Larry Bacow, president i Universitetit Harvard.
Sipas një vlerësimi të CNN, kjo masë e qeverisë së presidentit Donald Trump, mund të prekë deri në 1 milion studentë të huaj. Kjo natyrisht ndikon edhe tek të rinjtë shqiptarë që aspirojnë apo ndjekin studimet në SHBA.
Në bazë të të dhënave zyrtare, vetëm gjatë vitit të kaluar rreth 1 mijë shqiptarë vazhduan shkollën e lartë ose kolegjin në Amerikë.
