Vëllezërit Ernest dhe Donald Luka kanë pranuar autorësinë në dhunën me leva dhe sende të tjera të forta ndaj kuzhinierit Indrit Çela.
Autorësia është pranuar nga Ernest Luka, i arrestuar tashmë nga policia, ndërsa vëllai i tij, Donald Luka vijon të mbetet i shpallur në kërkim.
Para grupit hetimor, Ernest Luka ka deklaruar se e kanë dhunuar kuzhinerin Çela për shkak të një konflikti të hershëm fizik që kanë pasur bashkë me kunatin e tij për një parakalim makine.
“E rrahëm se kishin një konflikt të hapur me të dhe me kunatin e tij, me të cilin disa muaj më parë u përplasëm fizikisht për shkak të një parakalimi makine”, ka deklaruar Ernest Luka.
Ai ka zbardhur edhe gjithë dinamikën e ngjarjes, që nga momenti kur i bënë pritë me makinë e deri kur e zbritën me forcë nga mjeti dhe dhunuan me leva.
“Sapo e pamë se Indriti ishte duke lëvizur me makinë, iu afruam dhe i bllokuam rrugën dhe më pas e rrahëm”, vijon dëshmia e Ernes Lukës.
Kuzhinieri Indrit Çela u dhunua disa ditë më parë. Ai mori plagë të rënda në kokë dhe pjesë të tjera të trupit, ndërsa gjatë marrjes së dëshmisë së parë në polici e fshehu ngjarjen duke deklaruar se ishte aksidentuar.
