Dy prej aeroplanmbajtësve të ardhshëm të Marinës Amerikane do të emërtohen sipas ish-presidentëve Bill Clinton dhe George W. Bush, njoftoi të hënën Joe Biden, duke vazhduar një traditë të marinës amerikane.
“USS i ardhshëm William J. Clinton (CVN 82) dhe USS i ardhshëm George W. Bush (CVN 83) do të fillojnë ndërtimin në vitet e ardhshme”, tha presidenti në largim i SHBA-ve.
Aeroplanmbajtëset e SHBA-ve me energji bërthamore janë pjesa qendrore e aftësisë ndërkombëtare të projektimit të Marinës Amerikane.
Marina e SHBA-ve aktualisht ka 11 nga këto anije në shërbim, shifrën më të lartë në botë.
Që nga fundi i Luftës së Dytë Botërore, shumica e presidentëve amerikanë kanë pasur një aeroplanmbajtëse me emrin e tyre, të tilla si USS Gerald Ford, që iu dorëzua Marinës në 2017, ose USS John F. Kennedy, aeroplanmbajtësja e dytë që do të emërtohet pas presidentit të vrarë.
Bill Clinton ishte President i Shteteve të Bashkuara nga viti 1993 deri në vitin 2001, periudhë gjatë së cilës avionët luftarakë amerikanë kryen sulme në Irak dhe ish-Jugosllavi.
George W. Bush, ndërkohë, ishte pilot në Gardën Kombëtare Ajrore dhe shërbeu si qiramarrës në Shtëpinë e Bardhë nga viti 2001 deri në vitin 2009.
Dy mandatet e tij u përcaktuan kryesisht nga “lufta kundër terrorit”, e nisur pas sulmeve të 11 shtatorit 2001, e cila çoi në gati dy dekada konflikti në Afganistan dhe Irak.
Babai i tij, ish-presidenti i SHBA-ve, George H. W. Bush, kishte gjithashtu një aeroplanmbajtëse me emrin e tij, në shërbim aktiv që nga viti 2009.
Sekretari aktual i Mbrojtjes, Lloyd Austin, mirëpriti në një deklaratë vendimin për të emërtuar dy aeroplanmbajtës të ardhshëm sipas këtyre ish-presidentëve.
“Ashtu si emrat e tyre, këto dy aeroplanmbajtëse të ardhshme dhe ekuipazhet e tyre do të punojnë për të ruajtur sigurinë kombëtare, për të na kujtuar historinë tonë dhe për të frymëzuar të tjerët për t’i shërbyer republikës sonë të madhe”, theksoi shefi i Pentagon-it, i cili do të japë dorëheqjen brenda një jave.
