Kryeministri Edi Rama ka përcjellë një tjetër mesazh për qytetarët, duke kërkuar prej tyre të respektojnë masat, sidomos në këtë periudhë ku janë aplikuar disa masa lehtësuese për qytetarët. Pas komunikimit fillestar në telefon, Edi Rama ka zgjedhur tani postën elektronike të komunikojë me shqiptarët, prej të cilëve kërkon të ruajnë distancën fizike dhe të tregohen të përgjegjshëm për rrethin e tyre social.
“Uroj të jeni mirë me shëndet familjarisht! Teksa po hyjmë çdo ditë e më shumë në fazën 2 të përballjes me COVID19, duke rihapur punën në gjithë sektorët e ekonomisë, si edhe zgjeruar hap pas hapi fashën orare të lëvizjes, qoftë për këmbësorët e qoftë për automjetet, sjellja jonë në raport me rregullat ka një rëndësi jetike. Secili prej nesh duhet të bëjë me vetëdije të lartë detyrën karshi familjes dhe shoqërisë, në respektimin rigoroz të rregullave, për të mos lejuar zhbërjen e sakrificave të deritanishme dhe një kthim të dhimbshëm mbrapsht nëse Armikut të Padukshëm i hapen shtigje nga abuzimi me rregullat. Ju lutem mos harroni se kur dilni nga shtëpia, jeni nën shënjestrën e tij dhe lani duart shpesh, vendosni krahun para gojës kur teshtini, hapni sa më shumë dritaret. Mos ecni në këmbë me më shumë se sa një person tjetër në krah, mos krijoni asnjë grumbullim dhe ruani distancë 1.5m nga tjetri në radhët e pazareve“, shkruan Rama.
Gjithashtu, Edi Rama fton qytetarët që të tregojnë kujdes në vendin e tyre të punës, por edhe gjatë kohës kur lëvizin me makinë, që mos të mbajnë me shumë se një person tjetër brenda mjetit.
“Jini të vëmendshëm në vendin tuaj të punës dhe mos lëvizni me automjet me më shumë se një person tjetër brenda, diagonal me shoferin. Pasojat ligjore të shkeljes së rregullave janë të rënda, por secili prej nesh duhet t’i respektojë këto rregulla, jo thjesht pse kështu thotë ligji, po mbi të gjitha sepse vetëm kështu ruan veten, familjen, popullin dhe vetë Shqipërinë nga e keqja e madhe, që deri tani e kemi shmangur me kaq sukses së bashku”, shton ai.
Shefi i qeverisë thotë se duke bashkëpunuar të gjithë së bashku do të dalim më të fortë nga kjo betejë.
“Ne duhet e do ta fitojmë këtë luftë medoemos dhe do të dalim prej saj më të mirë dhe më të fortë! Së bashku! Më e mira do të bëhet, me durim, besim, solidaritet. Qofshi gjithnjë mirë familjarisht, Edi Rama”, thuhet në mesazhin Rama.
