Qeveria ka miratuar listën e apartamenteve për familjarët e viktimave të tërmeti tragjik të 26 nëntorit.
Në Fletoren Zyrtare është miratuar vendimi për miratimin e listave nr.1 dhe nr.2, në mbështetje të aktit normativ të Këshillit të Ministrave i miratuar më 30 nëntor të vitit të shkuar.
Lista prej 22 familjesh, është miratuar në bazë të shkresës së miratuar nga ministri i Bujqësisë, Bledar Çuçi më 12 dhjetor 2019, si drejtues qendror i operacionit për menaxhimin e fatkeqësisë natyrore.
“Ngarkohen njësitë e vetëqeverisjes vendore, përkatësisht sipas vendndodhjes së apartamenteve, të marrin masa për përballimin e shpenzimeve për dhurimin e tyre, përfshirë shpenzimet procedurale, të mobilimit dhe të pajisjeve elektroshtëpiake për këto apartamente nga fondi publik i banesave sociale dhe /ose fondi përkatës i buxhetit të shtetit. Ky vendim hyn në fuqi menjëherë dhe botohet në Fletoren Zyrtare”, thuhet në vendim.
