Presidenti turk Rexhep Tajip Erdogan ka realizuar një bisedë telefonike me homologët ballkanikë, Thaçi e Vuçiç, siç njoftohet zyrtarisht nga Zyra e tij.
Sipas asaj çfarë raporton AA, “Erdogan diskutoi zhvillimet rajonale dhe hapat për të forcuar marrëdhëniet me presidentin e Kosovës Hashim Thaçi dhe atë të Serbisë, Aleksandar Vuçiç. Nga Drejtoria e Komunikimeve e Presidencës së Turqisë gjithashtu bëjnë të ditur se tre liderët u pajtuan të vazhdojnë bashkëpunimin e ngushtë dhe konsultimin mbi çështjet dypalëshe dhe rajonale”.
Kujtojmë se kjo telefonatë vjen ditë pas nënshkrimit të marrëveshjes së Uashingtonit, ku dy palët, nën prezencën e presidentit Trump, morrën vendimin për zhvendosjen e ambasadave në Jeruzalem (në rastin e Kosovës, kur Izraeli ta njeh).
Kjo gjë ka provokuar zemërim në Ankara, pasi Turqia kundërshton me forcë shpalljen e Jeruzalemit si kryeqytet të Izraelit, shoqëruar kjo me zhvendosje ambasadash, një iniciativë e administratës “Trump”, por që kundërshtohet fort dhe nga BE.
Siç shihet, Presidenca turke është treguar e rezervuar në informacione më të detajuara lidhur me bisedat Erdogan-Thaçi dhe Erdogan-Vuçiç, ku për vetë arsyen e tyre, komunikimi s’ngjan të ketë qenë thjesht kortezial.
