Një universitet në Suedi po përdor një robot për të përshpejtuar gjetjen e kurës së COVID-19.
Roboti, i quajtur Eva, është një sistem laboratorik i drejtuar prej inteligjencës artificiale e cila gjeneron në mënyrë automatike detyra të ndryshme, si testimin e lëndëve kimike, apo planifikimin dhe kryerjen e eksperimenteve të ndryshme.
“Eva kontrollon gjithë listën e lëndëve kimike që ka dhe përpiqet të gjejë strukturën e njëjtë. Më pas, ajo vendos çfarë do të bëjë, në varësi të hapit të mëparshëm”, shpjegon shkencëtarja Ivgeniia Tiukova.
Sipas ekspertëve, Eva është e aftë të ndërmarrë punë që përndryshe do të duhet t’i bënin shkencëtarët, duke iu lënë kështu hapësirë që të fokusohen në detyra të tjera më të vështira.
Eva erdhi në jetë në Universitetin e Mançesterit në veri të Anglisë, ku së pari u mor me zbulimin e trajtimeve kundër malaries.
Krijuesi i saj, shkencëtari britanik Ross King, tha në një deklaratë se shpreson që Eva të ndihmojë hulumtuesit të kenë më shumë kohë të lirë për çështje më komplekse.
“Kjo do të lejojë shkencëtarët që të bëjnë ato punët krijuese për të cilat shkëlqejnë, duke kontribuar kështu në zgjidhjen e sfidave shoqërore”, tha ai.
