“Po e vë dorëheqjen time në dispozicion të Emmanuel Macron”. Kështu e njoftoi largimin nga pushteti pas disfatës në raundin e dytë të zgjedhjeve legjislative kryeministri francez Gabriel Attal, që vjen nga radhët e partisë së Presidentit.
“Partia politike që unë përfaqësoja nuk ka shumicë. Pra, në përputhje me traditën demokratike, nesër në mëngjes do t’i paraqes dorëheqjen presidentit të Republikës. Unë do të kryej detyrat e mia për aq kohë sa të duhet”, tha ai.
“Kam paralajmëruar tre rreziqe: rrezikun e shumicës absolute të Frontit të Ri Popullor, Tubimit Kombëtar dhe shembjen e ideve dhe vlerave tona. Këto tre rreziqe u përjashtuan nga populli francez. Asnjë shumicë absolute nuk mund të dominohet nga ekstremet. Rryma politike që unë përfaqësoja është gjallë. Ne i kemi mbajtur qëndrimet tona dhe jemi të vendosur”, nënvizoi Attal, duke vlerësuar faktin që sipas sondazheve “makronistët” do të jenë forcë e dytë në Asamblenë Kombëtare.
Në vijim Attal deklaroi se një epokë e re po nis për kombin francez dhe vuri theksin te përgjegjësia e madhe që kanë marrë mbi supe.
“Përgjegjësia jonë është e madhe. Kudo që të jem, do të kem gjithmonë të njëjtin synim: të qetësoj, të bashkohem dhe të veproj. Ne gjithashtu duhet të pranojmë se duhet të vëmë në dyshim gjithçka në mënyrë që të mishërojmë edhe një herë shpresën për popullin francez”, përfundoi ai.
