Në fjalimin e saj të parë si presidente e Kosovës, Vjosa Osmani theksoi nderin personal për këtë zgjedhje, por edhe mesazhin e rëndësishëm që Kosova i jep rajonit, ku Prishtina sipas saj po tregohet “model edhe për shtet më të konsoliduara”.
“Është nder i madh për mua që me bekimin tuaj, t’iu drejtohem në cilësinë e presidentes së vendit tonë, për 5 vitet e ardhshme.
Vendimi juaj, më vesh me shumë përgjegjësi. Dashuria për Kosovën ka qenë motivimi më i madh në rrugëtimin tim politik. Sot është dita e Kosovës, sepse përfaqësuesit tuaj po e përmbyllin me dinjitet procesin, është dita ku dëshmojnë se me vendosmëri ne dimë të përballojmë sfidat dhe t’i japim kuptim”, ishin fjalët e saj të para.
Gjatë fjalimit, Osmani iu drejtua edhe grave kosovare. “Sot Kosova zgjodhi edhe një herë presidente grua. Vajzat e kanë vendin vetëm aty ku ato dëshirojnë, aty ku ëndërrojnë çdo natë. Pavarësisht profesionit që dëshironi, mos ndalni hapin e juaj kurrë. Unë do t’iu mbështes me gjithë mundësitë që kam, do të jem pranë jush kur do të sfidoheni dhe do të krenohem me ju kur do të triumfoni” .
Presidentja e re kosovare theksoi edhe që Kosova mund të cilësohet tashmë si “model edhe për shtete më të konsoliduara, por kemi ende shumë punë për të bërë”.
