Fjalimi i kryeministrit Edi Rama për Kosovën në Asamblenë Parlamentare të Këshillit të Europës nuk mund të kritikohet lehtë, ka deklaruar deputeti demokrat Agron Gjekmarkaj nga salla e parlamentit, duke dalë në këtë mënyrë kundër rrymës së partisë së tij që e ka kritikuar fjalimin e kryeministrit.
Ndonëse e Ramën e cilëson si kundërshtarin e tij që duhet të largohet sa më shpejt nga qeveria,këtë herë Gjekmarkaj ka rënë dakord me mesazhet që kryeministri dha një ditë më parë në Strasburg.
“Dje në Asamblenë e Këshillit të Europës u fol për Kosovën dhe kjo tregon se Kosova është shenjë në ndërgjegjen e tij. Foli dhe kryeministri i Shqipërisë, i cili është kundërshtari im politik, që çdo ditë të qeverisjes së tij e konsideroj shkelje të së drejtës, por fjalimi i tij dje për raportin e Dick Marty nuk mund të kritikohet lehtë. Ndoshta është më i kalkuluari që ai ka mbajtur. Por nga ana tjetër në këto 9 vite ai ka marrëdhëniet më të këqija me kryeministrat e Kosovës”, tha mes të tjerash Gjekmarkaj.
