Pas humbjes së papritur kundër Torinos, Roma përgatit autokritikën. Mundësia është një nga ato lakmitaret, sepse nesër në mbrëmje (20:45), Cristiano Ronaldo dhe Dybala do të mbërrijnë në “Olimpico”. Më shumë se këto të dy, mbërrin Juventusi kampion. Në prag të supersfidës, trajneri Fonseca doli para gazetarëve në konferencën e zakonshme për shtyp:
Juventusi po përpiqet ta ndryshojë mentalitetin e tij me Sarrin, Çfarë mendoni për këtë?
Nuk e njoh mirë të kaluarën e Juventusit, me trajnerët e tjerë, vetëm me Sarrin. Ai është një nga më të mirët në Europë, me ide pozitive të futbollit, që më pëlqejnë dhe mua shumë. Po ndërton një ekip shumë të fortë.
Me Juventusin përfundon gjysma e parë e kampionatit, por asnjëherë nuk keni fituar me shtatë ekipet e para në klasifikimin aktual. Çfarë ju mungon në ndeshjet e mëdha?
Kjo skuadër ka luajtur gjithmonë mirë me më të mirët e Serie A. Është e vërtetë që kemi humbur ndaj Atalanta dhe Parma, por mendoj se gjithmonë kemi luajtur mirë dhe me guxim. Problemi nuk është kundër këtij lloji kundërshtari. Jam më i shqetësuar kur luajmë me Genova dhe Torino sesa ndaj Interit, Juventusit, Napolit. Problemi është te mentaliteti dhe ambicia. Nëse duam të shkojmë në vendet e para, pranë Juves dhe të tjerëve të mëdhenj, nuk mund të gabojmë me të vegjlit. Është çështje mentaliteti dhe po punojmë për ta ndryshuar.
Për tifozët, Roma-Juventus është shumë e rëndësishme për një rivalitet historik midis dy klubeve. A janë lojtarët gati për një paraqitje të ngjashme me tifozët?
Të luash me Juventusin nuk është një ndeshje normale, e di që është e veçantë. Ne duhet të kuptojmë se është një lojë, ku nuk mund të gabojmë. Përqendrimi i plotë është i nevojshëm. Nga ana tjetër, unë mendoj se lojtarët janë shumë të motivuar. Unë thashë që kur kemi kësi ndeshjesh nuk shqetësohem, por kur luajmë me Torino dhe Sassuolo.
Çfarë qëndrimi mbrojtës duhet të keni me Juventusin?
Njësoj si ndaj Interit. Nuk mund të gabojmë në mbrojtje kundër kësi kundërshtarësh dhe lojtarësh. Mënyra jonë e mbrojtjes është e njëjta; një ekip i shkurtër, pa hapësirë midis linjave.
