Ushtria spanjolle dëboi në Marok më shumë se 4800 migrantë që notuan në brigjet e saj.
Midis tyre janë rreth 1,500 nën moshën 18 vjeç, por edhe fëmijë të vegjël, siç dëshmohet nga fotografitë e bëra nga Garda Civile Spanjolle. Një prej tyre është mbase dëshmia më e mirë e Golgotës që kalojnë familje të tëra – një foshnjë, vetëm disamuajshe, në duart e një shpëtuesi në ujin e ftohtë të detit.
“Rreth 8,000 migrantë janë zhvendosur në Ceuta, një enklavë spanjolle në Afrikën e Veriut,” tha kryeministri spanjoll Pedro Sanchez.
Migrantët nga Maroku përdorën kontrollin më të dobët të kufirit në vendin e tyre për të notuar në territorin evropian, gjë që shkaktoi një krizë humanitare në Spanjë.
Ardhja masive e migrantëve në Ceuta filloi të hënën dhe vazhdoi të martën, edhe pse në numër më të vogël, për shkak të kontrollit të shtuar në anën spanjolle të kufirit, ku ishin vendosur policia dhe ushtria. Të martën vonë, pas takimeve dypalëshe të nivelit të lartë, forcat marokene filluan kontrollin e kufirit dhe ndalimin e grupeve të migrantëve.
Fotografitë e këtyre skenave tronditëse, të cilat tregojnë fëmijë dhe migrantë më të rraskapitur të shtrirë në plazh ndërsa mjekët i ndihmojnë ata, kanë udhëtuar nëpër botë.
Vëmendja më e madhe u shkaktua nga ajo në të cilën një anëtar i ekipit të shpëtimit mban foshnjën mbi ujë në thellësitë e mëdha të detit.
Kjo foto u postua gjithashtu në Twitter nga shefi i misionit të BE të Organizatës Ndërkombëtare për Migracionin, Eugenio Ambrosio, me komentin: “Errësira vazhdon”.
