Kryeministri Edi Rama në një fjalim të gjatë sot në Parlament ka sulmuar frontalisht dy partitë e opozitës, Partinë Demokratike dhe Lëvizjen Socialiste për Integrim.
Gjatë fjalës së tij, Rama përdori pa kursim ironitë dhe sarkazmën për kundërshtarët e tij.
Rama foli me ironi, ndërsa tha se shkaku pse shqiptarët votuan PS duke i dhënë shumicën qeverisëse ishte “se PS di të mbajë përgjegjësi” ndërsa “PD e LSI janë jetimë të papërgjegjshmërisë”.
“Jo se ne nuk jemi të pakonkurueshëm, por ju nuk jeni në garë. Jeni njerëz të gabuar në vendin e gabuar dhe në kohën e gabuar” tha Rama.
Rama hodhi poshtë akuzat për lidhje me krimin dhe akuzoi PD se vazhdon të ketë “program laj thaj kanotierën e sulmuesit të Saliut.”
“Unë nuk jam as përdorues as shitës dhe as trafikant dhe as bos i trafikut të drogës”, tha Rama, ndërsa shtoi se “PD “me zero lidership”. Nuk ka reflektuar, “zero”. Nuk ka asnjë vizion, “bosh”, asnjë program ‘fushë”. Asnjë ide dhe asnjë titull të ri, vetëm këngën e vjetër shaj e shaj se diçka do të mbetet”.
Rama tha më tej se në në “PD janë “gjysmagjelë” që nuk kanë reflektuar fare as nga rezultati i zgjedhjeve por nuk kanë ndryshuar as vullnetin e tyre destruktiv dhe negativ ndaj vendit“.
Në këtë fushatë sipas Ramës është përfshirë dhe LSI e cila ”dashurinë e qetësinë e ka zëvendësuar llapazanëri e vajmedetëri”.
Disa nga batutat e Ramës sot:
Rama për programin e PD:
-Për kë do të votojnë shqiptarët?! Për programin keni laj thaj kanotierën e sulmuesit të Saliut.
Për skuadrën e re, laj thaj top i gjatë rrëmujë para porte e dalë ku të dalë.
Apo do të votojë për liderin?!
Laj, thaj, arno të vjetrat.. dil në fushë.. ky nuk është lidership tani hajde bini këmbëve sa të mundeni. Ju hajdeni bini këmbëve me kanotierën e sulmuesit.
Rama për opozitën:
-Jeni komplet bosh, bosh lart e bosh poshtë, bosh para e bosh mbrapa
Rama për Bashën:
“Edhe miku im Lulzim Basha pasi bëri akt lidershipi me 18 maj e mohoi se u tremb, nga frëngjitë e Jozefinës dhe Patozit nga kryengritja në pallat, nga ofiqarët e SHQUP-it që humbën karriget, dhe u kthye te çadra e dasmave.
E mohoi dhe ça bëri ripohoi politikën qorre, shurdhe, memece që për katër vite ju katandisi juve në gjysmagjel.
Rama për bashkëpunimin Basha-Kryemadhi
Edhe LSI, që qetësinë dhe dashurinë e ktheu në llapazanëri dhe vajmedetërinë e linjës së re.
Bir o Lul vëllai kë të qaj më parë, ty a motrën tonë që keni një hall”. Po kjo natyrisht është një çështje e kotë, retorike sepse ka më shumë emocion se kë të qash më parë, vëllain apo motrën që kanë një hall dhe që halli i ka bërë bashkë si një kazan që ky nga ku dëgjohen thirrjet bombastike si të të luftojmë krimin, drogën se në fakt krimi dhe droga e kanë fajin që ju jeni papërgjegjshmëri.
Kur do vijë në pushtet PD sipas Ramës:
Ju me tuajën jeni në rregull, pasi nuk lini gjë pa sharë, kur dikush nëpër dhëmbë iu thotë keni rrjedhur. Fajin e kemi ne që votohemi dhe bëjmë sukses, ju nuk keni asnjë faj.
Jeni kthyer pas marshimit në çadrën e dasmën me 9 deputetë më pak dhe 200 mijë pupla më pak, i latë rrugës dhe nuk reflektoni. Ngrini volumin si frikacaku kur përshkon pyllin natën.
Sa të ketë krim, drogë dhe mafie dhe 100 fjalë të tjera për garniturë kur vjen fjala e 101 ngelni. Dhe për 100 vite të tjera ju jeni në rregull, priteni pushtetin që t’iu vijë.
