Aktorë dhe aktore në disa qytete në SHBA u janë bashkuar skenaristëve në grevën e tyre, duke u larguar nga puna për një kohë të pacaktuar.
Të premten, në qytete përfshirë Los Anxhelesin dhe Nju Jorkun, aktorët iu bashkuan skenaristëve që kanë qenë në grevë që nga fillimi i majit.
Ata duruan temperaturat përvëluese për të protestuar përpara studiove të filmit dhe selisë së shërbimeve të transmetimit dhe stacioneve televizive.
Yjet si Susan Sarandon dhe Jason Sudeikis ishin në mesin e atyre që protestonin.
Është hera e parë që nga viti 1960 që aktorët dhe skenaristët protestojnë së bashku.
Sindikata e aktorëve SAG-AFTRA po kërkon pagesa më të mira për anëtarët e saj dhe rregullore mbi përdorimin e inteligjencës artificiale.
Greva e aktorëve u vendos zyrtarisht të enjten pasi nuk u arrit asnjë marrëveshje me Shoqatën e Studiove të TV dhe Filmit (AMPTP) megjithë negociatat me javë të tëra.
Me disa përjashtime, të gjitha xhirimet me aktorë dhe aktore tani do të duhej të ndërpriteshin, tha SAG-AFTRA.
Sipas mediave amerikane, xhirimet e filmave dhe serialeve tashmë janë praktikisht në ndalesë.
Përveç kësaj, anëtarët e sindikatave nuk lejohen të marrin përsipër ndonjë punë prapa kamerës ose të promovojnë filmat dhe serialet e tyre përmes paraqitjeve publicitare dhe intervistave.
Sindikata tha se planifikonte të kontrollonte rreptësisht këto kushte.
Xhirimet e shumë filmave u pezulluan të premten, përfshirë ”Deadpool 3”, vazhdimin e ”Gladiatori”-t dhe edicionin e tetë të ”Mission: Impossible”.
Megjithatë, ka të ngjarë të kalojë pak kohë para se shikuesit e kinemasë të vënë re efektet e grevave, pasi shumica e filmave të suksesshëm për këtë vit tashmë janë xhiruar.
