Vrasja e Bledar Dedaj po hetohet nga autoritetet italiane, por detajet e reja që janë zbuluar nga skena e krimit, kanë hapur pista të reja. 39-vjeçari shqiptar është gjetur mëngjesin e djeshëm nga një mik i familjes. Trupi i tij i ishte hedhur në një shkurre dhe i masakruar me thikë. Disa shumë të thella, ndoshta të shkaktuara me majën e thikës. Një nga goditjet i shpoi mushkërinë, duke i marrë edhe jetën. Ai po ashtu kishte plagë të shumta edhe në pjesën e krahëve, që do të thotë se tentoi që vetëmbrohej.
Një tjetër detaj që ngre dyshime është fakti që 39-vjeçari u gjet me pantallonat e zbërthyera. Autopsia do të vërtetojë nëse ai ka pasur apo jo marrëdhënie seksuale. 100 metra larg trupit ishte makina e tij, një Mercedes i bardhë Class B, i parkuar në anë të shtegut. Një zonë ideale për t’u takuar, veçanërisht në mbrëmje, larg syve kureshtarë.
Një nga pistat që po ekzaminohet nga hetuesit është pikërisht ai i një përplasjeje që përfundoi me gjak. Por nuk mund të përjashtohen hipoteza të tjera, si ajo e larjes së hesapeve.
Dedja, i cili kishte ardhur në Itali 20 vjet më parë, i martuar dhe baba i dy fëmijëve, ishte zhdukur që prej pasdites të së shtunës. Ai u pa për herë të fundit në restorant-piceri Borso del Grappa, L’Antica Abbazia, ku punonte si kopshtar dhe pastrues. Pastaj ai nuk u kthye më.
Telefonata e fundit, me kunatin e tij, ishte në orën 16:15, kur ai sapo kishte mbaruar turnin dhe ishte gati për të shijuar fundjavën. Të dielën do ta kalonte duke peshkuar me një shok: të dy kishin rënë dakord tashmë. Por kur shoku i tij u paraqit në 2 të mëngjesit në shtëpinë e tij, askush nuk doli. 39-vjeçari nuk iu përgjigj telefonatave apo mesazheve. Edhe gruaja e tij ishte e shqetësuar për orë të tëra pasi e telefononte por nuk i përgjigjej. Në atë moment miqtë dhe të afërmit filluan ta kërkonin. Mendimi i parë ishte se mund të kishte pasur një aksident, ndaj kontaktuan urgjencën më të afërt, atë në Bassano. Asgjë. Pas një nate pa gjumë, mëngjesin e djeshëm, familjarët e tij shkuan për të denoncuar zhdukjen e tij në komisariat, paralelisht vijonin kërkimet. Ka qenë miku i tij peshkatar Marco Barbi ai që ka vënë re makinën e 39-vjeçarit në rrugën e malit. Ishte ora 9.30. Njëqind metra më tutje, thellë në shkurre, ishte trupi i Dedjes i mbuluar me gjak.
Viktima dhe xhelati i tij mund të kenë vendosur takimin në vendin e fshehtë, por nuk dihet përse. Në këto orë hetuesit po hetojnë kontaktet dhe njohjet e viktimës. Gjithashtu po shqyrtohen regjistrimet telefonike dhe pamjet nga kamerat publike dhe private të instaluara në zonë. Në lupë është edhe e shkuara e tij, duke qenë se Dedja kishte pas vetes disa precedentë të vegjël.
Ndërkohë familja e shqiptarit kërkon me dëshpërim zbardhjen e ngjarjes së rëndë. Duke folur për mediat italiane, vëllai dhe motra e 39-vjeçarit mohuan që ai të kishte probleme me drogën, paratë apo persona të tjerë.
Ata kërkuan me ngulm të vërtetën për vrasjen e Bledarit, ndërsa hodhën edhe hipotezën se ai mund të jetë vrarë pasi zbuloi diçka që nuk duhej.
“Nuk e di çfarë ka ndodhur. Është një rrufe në qiell të hapur. Duam drejtësi. Ndoshta ka parë a dëgjuar diçka që nuk duhej,”- thotë i vëllai, ndërsa edhe e motra kërkon drejtësi: “Duhet të na thonë kush ka qenë autori. Nuk kishte probleme me drogën dhe paratë”.
Familjarët dhe kolegët e punës e përshkruajnë atë si një punëtor dhe një familjar të mirë. Por pse u vra? Kjo mbetet të zbulohet.
