Ekipi i fushatës së Kamala Harris njoftoi se kishte mbledhur 310 milionë dollarë në korrik, më shumë se dyfishi i fondeve të mbledhura nga Donald Trump, një shumë e mbledhur kryesisht që kur zëvendëspresidentja zëvendësoi Joe Biden në zgjedhjet e nëntorit.
Ndërsa financimi luan një rol thelbësor në fushatat amerikane, shpesh në shuma astronomike, kandidatja e re demokrate kishte mbledhur 200 milionë dollarë në më pak se një javë pas tërheqjes më 21 korrik të Joe Biden.
Ekipi i Kamala Harris “mblodhi 310 milionë dollarë në korrik, shuma më e madhe për zgjedhjet e 2024″, njoftoi ekipi në një deklaratë për shtyp.
”Ky grumbullim fondesh u ushqye nga muaji më i mirë i mbledhjes së fondeve nga donatorët e vegjël në historinë e zgjedhjeve presidenciale dhe përfaqëson më shumë se dyfishin e asaj që ngriti fushata e Donald Trump në të njëjtin muaj”, shtoi ekipi i Harris.
Ekipi i kandidatit republikan njoftoi në një deklaratë të enjten se kishte mbledhur 138,7 milionë dollarë në korrik, një shumë e konsiderueshme e mbledhur në muajin kur Donald Trump i mbijetoi një atentati dhe mori mbështetje triumfuese në konventën republikane.
Shumat marramendëse të fushatave presidenciale amerikane shpenzohen kryesisht për klipe shumë të shtrenjta që promovojnë rezultatet dhe premtimet e kandidatëve.
OJQ-ja ”Open Secrets”, e specializuar në financimin politik, vlerëson se zgjedhjet e 2024-ës mund të jenë më të shtrenjtat në historinë amerikane.
