Kelment Çupi ishte një prej viktimave të tërmetit të së martës, i cili luftoi gjatë për të mbijetuar. Për 16 orë qëndroi i bllokuar nën beton, ndërkohë që 4 ekipe punonin për ta shpëtuar. Gjatë kësaj kohe ai komunikonte, kërkonte ndihmë. Ekipet e shpëtimit bënë gjithçka për t’i shpëtuar jetën, por në fund 34-vjeçari nuk ia doli. Në studion e Opinion, gazetari i Tv Klan, Spartak Koka tha se Kelmenti vdiq nga gjakderdhja. Por më parë, i riu kërkoi të ushqehej dhe kështu bëri, pa e ditur ndoshta se ai do të ishte vakti i fundit për të.
“Ka luftuar për 16 orë. E kemi ndjekur për 5 orë të paktën operacionin për të, e kemi edhe kur kërkon ndihmë dhe kur 4 grupe të njësive speciale, të ushtrisë shqiptare, kosovare, RENEAS, zjarrfikëseve, nuk bënin dot asgjë”.
“Blloku i betonit ishte i vështirë në çdo anë që mund ta lëviznin, mund t’i shkaktonte vdekjen. 16 orë duke vuajtur, kanë qenë doktorët për një farë kohe që e mbanin me qetësues, e mbanin me stimulantë”.
“Ishte rrëqethëse edhe të filmojë në atë moment. Nuk bënin dot asgjë (grupet e shpëtimit). Ka ngrënë bukë dhe pastaj ka vdekur. Pasi kanë lëvizur njërin prej blloqeve dhe sipas të dhënave nga vendngjarja ka patur një rrjedhje masive të gjakut, hemorragji në krahun e djathtë të këmbës që e kishte të bllokuar. Komunikonte, fliste, ka qenë ndër të parët që ka folur, ka komunikuar”, tha Koka.
Gazetari tregoi më tej se për të shpëtuar Kelmentin një punonjës i RENEA, ndonëse i plagosur, qëndroi deri në fund për ta shpëtuar 34-vjeçarin. Kelment Cara jetonte bashkë me vëllain e tij jashtë Shqipërisë dhe kishin pak kohë që ishin kthyer.
“Madje një punonjës i RENEA-s i cili u plagos rreth orës 7 të mëngjesit, ka qëndruar në detyrë për ta shpëtuar. Ka refuzuar të largohet nga vendngjarja për të shpëtuar Kelmentin. Unë nuk largohem tha, do rri ta shpëtoj. Fati i keq deshi që të mos shpëtonte. Kelmenti ka humbur edhe pjesëtarë të tjerë të familjes së tij. Kelmenti bashkë me vëllain e tij, jetonin jashtë, së fundmi kishin ardhur në Shqipëri”.
