Kryeministri Edi Rama zhvilloi një tjetër takim ku në fokus ishte plani për luftën ndaj informalitetit. Rama deklaroi se nuk do të pranohen më deklarime pagash të cilat nuk janë të besueshme. Kjo do të bëhet mbi bazat e analizave të tregut, theksoi ai.
Rama mori si shembull sektorin e ndërtimit, ku tha se deklarime e pagave në 60 mijë lekë do kthehen mbrapsht. Ai theksoi se ata që nuk e kryejnë siç duhet deklarimin do të përballen me situata njësoj si ata që nuk paguanin energjinë elektrike, çka mund të çojë në kolaps të kompanisë.
Para strukturave tatimore që ishin në takim prezantoi edhe disa nga “armët” e qeverisë në këtë luftë. Ai tha se një nga mundësitë është edhe që ligji të bëhet si në vendet nordike.
“Merrini shumë seriozisht, të gjithë. Po flas me të gjitha kompanitë që janë tek kjo zonë ku grabiten pensionistët rregullisht që deklarimi i pagës duhet të jetë serioz, i vërtetë. Jemi dëshmitarë të gjithë. Dolën pagat rrugëve, për shkak të sistemit dixhital të hakeruar. Vetëm nga ajo pati një rritje të deklarimeve sepse u kuptua. Megjithatë jemi duke studiuar edhe mundësinë që ta bëjmë si vendet nordike, të detyrojmë nxjerrjen e pagave të të gjithëve me ligj. Që të gjithë ta shohin se kush paguan çfarë. Kjo është arma e fundit. Tjetra është hyrja më thellë pastaj në inspektime, krimi ekonomik i Ministrisë së Brendshme etj. Nuk janë as kërcënime, as presione. Janë thjesht informacion transparent për çfarë kemi ndërmend të bëjmë. Kemi që në fillim të këtij viti që jemi ulur me një grup pune të gjerë, me ekspertë ndërkombëtarë, me praktikat më të mira të studiuara të analizuara që ti japim përgjigje pensionistëve ça do bëhet me ne. Dhe ça do bëhet me ta nuk ka kush e jep përgjigjen tjetër përveç kësaj qeverie”, tha Rama.
Po ashtu Rama paralajmëroi masa drastike për çdo biznes të vogël që nuk paguan sigurimet shoqërore deri në mbylljen e aktivitetit.
“Nëse Shqipëria do të vazhdonte mbi taksën e sheshtë mbi pagën, ne do të kishim më shumë të ardhura edhe për sigurimet shoqërore, por do të merrnim më shumë nga xhepi i punonjësve. Ne e hoqëm taksën e sheshtë dhe e bëmë progresive dhe kemi hequr dorë nga jo pak, por nga një shumë e konsiderueshme që ia kemi lënë mësuesve, infermierëve, kamarierëve etj. Si t’ia bëjmë ne kur për 17 sektorët e ekonomisë janë 156 mijë të punësuar që deklarohen me pagë 50 000 lekë sepse e dimë të gjithë që kjo pagë është përjashtuar nga taksimi. Duke i parë sektorët me radhë, nuk ka logjikë që ta pranosh këtë gjë sepse janë paga të gënjeshtërta. Mirëpo, nga kjo gënjeshtër dhe nga kjo qasje kriminale ndaj pensionistëve ne kemi një gropë shumë të madhe, të cilën e kompensojmë sot që flasim duke vendosur gjysmë miliardë euro për të plotësuar pensionet sepse pa këtë gjysmë miliardi pensionet nuk mund të jepen në nivelin që janë sot. Është kollaj të premtosh kur e di që nuk do të kesh gjë në dorë. Problemi i pensioneve nuk zgjidhet me dëshirën e mirë vetëm. Rritja e pensioneve nuk zgjidhet duke ua marrë fëmijëve që sot janë të mitur dhe kanë nevojë për investime të tjera. Taksat janë për fëmijët, për të ardhmen, për shkolla, spitale dhe infrastrukturë. Sigurimet shoqërore janë për të moshuarit, janë dy gjëra të ndara komplet dhe nuk puqen bashkë”, shtoi kryeministri.
Më tej, ai theksoi se sipërmarrësit kanë edhe një arsye tjetër për të paguar sigurimet shoqërore.
“Nëse duam të shtojmë pensionet, edhe nëse i shtojmë në mënyrë të njëanshme, nuk i shtojmë dot sa duhet nëse nuk futet në lojë pala tjetër, që janë sipërmarrësit. Kur të shkoni te dera e botës tjetër, ku nuk ka karta krediti dhe nuk funksionon leku në dorë, do të dalë Shën Pjetri dhe kur t’i thoni se çfarë keni bërë. Qoftë edhe për këtë moment, ato që u takojnë pensionistëve nuk duhet të diskutohen. I falen Allahut 5 herë në ditë dhe nuk i paguajnë sigurimet shoqërore ashtu siç duhet”, u shpreh Edi Rama.
