Policia e Tiranës njoftoi arrestimin e tre personave për ngjarjen e ndodhur në 9 shkurt në Kamëz, ku iu vendos lëndë plasëse poshtë makinës të Gjon Menës. Mëngjesin e 9 Shkurtit Mena po shkonte tek makina e tij, kur sapo hapi dyert me pult shpërtheu tritoli dhe ai mbeti i gjymtuar.
Për këtë ngjarje policia prangosi Gjergji Cukalin, 42-vjeç, një emër i njohur për drejtësinë dhe që në të kaluarën është thirrur me nofkën “i forti i Myslym Shyrit”.
Në pranga janë vënë edhe dy vëllezër, Enver J., 33 vjeç dhe Edmond J., 24-vjeç. Sipas burimeve nga policia e Tiranës ka qenë Cukali ai që ka porositur ekzekutimin me eksploziv të Gjon Menës, që mbeti në tentativë.
Të njëjtat burime thanë se Cukali u ka premtuar 40 mijë euro dy vëllezërve, për eliminimin e Menës. Fillimisht ai u ka dhënë atyre 10 mijë euro, duke u premtuar se do u jepte edhe 30 mijë të tjera në momentin e eliminimit të 32-vjeçarit.
Njëri nga vëllezërit ishte marrë me krijimin e lëndës plasëse, ndërsa tjetri kishte për detyrë ta vendoste poshtë makinës luksoze të Menas. Policia tha se ka sekuestruar një makinë, e cila besohet se është përdorur nga dy vëllezërit në momentin që kanë vënë lëndën eksplozive në makinën e Gjon Menës.
Policia thotë se është ende duke punuar për të zbardhur konfliktin mes Menas dhe Cukalit, të dy persona me precedentë penalë në të kaluarën, si brenda dhe jashtë vendit.
Personi kryesor i arrestuar për ngjarjen, Gjergj Cukali, ka qenë i ndaluar edhe për vrasjen e ish-policit Arben Bilalit në Tiranë, por gjykata e shpalli të pafajshëm.
Burime policore thanë se atentati me tritol ndaj Gjon Menës, po hetohet si vrasje e mbetur në tentative, me pagesë.
