Shqipëria përfshihet nga vala e të nxehtit afrikan. Sipas sinoptikanëve, muaji qershor nis me temperatura të larta, ku ditët e para do të arrijnë deri në 35 gradë.
“Kjo fundjavë do të sjellë një valë të të nxehtit që vjen nga Afrika, godet Gadishullin e Ballkanit duke bërë që edhe territori shqiptar të preket nga kjo valë e të nxehtit, duke bërë që maksimumet e temperaturave të ngjiten në vlerën 34 apo 35 gradë Celsius në rang territori”, tha meteorologu Hakil Osmani.
Por i gjithë 15 ditëshi i parë i Qershorit mbetet me temperatura të larta.
“Parashikohet që të jetë me temperatura të larta, presim maksimumet që në rang territori të ngjiten në vlerën e 37 gradë Celsius”, tha meteorologu Hakil Osmani.
Sipas sinoptikanëve, temperaturat për muajin Qershor janë 4 gradë mbi normalen.
“Këto temperatura janë 3 apo 4 gradë mbi normalen e muajit Qershor”, tha meteorologu Hakil Osmani.
Temperaturat më të larta do i përjetojnë qytetet e Ultësirës Perëndimore, por edhe zonat bregdetare, të cilat janë mjaft të frekuentuara nga qytetarët.
