Habib Rexha, 31-vjeç, dyshohet të jetë autori i vrasjes së Arian Gosës, pasditen e kësaj të diele në Kavajë. Lajmi konfirmohet zyrtarisht nga policia e cila sjell edhe foton e autorit të dyshuar.
Ai mësohet se është vëllai i Altin Rexhës, 43-vjeçarit që u vra më 29 mars të këtij viti pas sherrit me Armand Gosën. Nga kjo ngjarje mbeti i vrarë edhe ky i fundit, ndërsa 48-vjeçari i ekzekutuar këtë të diel ishte vëllai i tij.
Policia, në njoftimin e saj për mediat tha më herët se shkak për vrasjen e sotme dyshohet se ishte pikërisht motivi i hakmarrjes. Aktualisht Habib Rexha ndodhet në arrati dhe policia po punon për kapjen e tij.
Po ashtu autoritetet kanë vënë në dispozicion edhe një shpërblim prej 10 000 eurosh, për çdo informacion të vlefshëm që do të çojë në kapjen e autorit.
“Në vijim të veprimeve të kryera nga grupi hetimor, pas këqyrjes së pamjeve filmike dhe verifikimeve të kryera, është bërë i mundur identifikimi i autorit të dyshuar të vrasjes së shtetasit Arian Gosa, i cili është shtetasi Habib Rexha, 31 vjeç. Policia e Shtetit fton qytetarët që të japin informacion për autorin e kësaj ngjarjeje dhe vendos shpërblim 10 000 euro, për çdo informacion të vlefshëm që do të çojë në kapjen e autorit. Policia e Shtetit vendos në dispozicion të qytetarëve, numrin e telefonit 069 84 59999, duke garantuar anonimatin e plotë të çdo telefonuesi”, thuhet në njoftimin e policisë.
