Hëna, të gjithë e dimë se, dikton baticat, por një studim i botuar thotë se ndikon edhe në gjumin tonë.
Konkretisht, studimi, i botuar në Science Advances, thotë se në ditët para hënës së plotë, njerëzit shkojnë në shtrat më vonë dhe flenë më pak.
Studiuesit zbuluan se pjesëmarrësit në studim shkuan në shtrat një mesatare prej 30 minutash më vonë dhe fjetën 50 minuta më pak natën para hënës së plotë, tha bashkautori i studimit Horacio de la Iglesia, profesor në departamentin e biologjisë në Universitetin e Uashingtonit në Seattle.
Studiuesit pajisën secilin pjesëmarrës me një monitor gjumi për të monitoruar oraret e gjumit gjatë një deri në dy cikle hënorë. Një cikël hënor zgjat 29.5 ditë, shkruan CNN.
Nëntëdhjetë e tetë njerëz nga tre komunitete të ndryshme indigjene Toba, të njohur gjithashtu si popujt Qom të Argjentinës, morën pjesë në studim.
“Drita nga hëna është e fortë gjatë netëve që i paraprijnë hënës së plotë”, tha një tjetër bashkautor i studimit, Leandro Casiraghi, një bashkëpunëtor postdoktoral në Departamentin e Biologjisë në Universitetin e Uashingtonit.
Siç shpjeguan studiuesit, një komunitet nuk kishte qasje në energji elektrike, një tjetër kishte ca akses në energji elektrike, dhe një i tretë kishte qasje të plotë në energji elektrike.
Por, pavarësisht nga aksesi në energji elektrike, ekzistonte një model i fortë që tregonte se të gjithë shkonin në shtrat më vonë dhe flinin më pak netët para hënës së plotë.
Në komunitetin urban, pjesëmarrësit shkuan në shtrat edhe më vonë dhe fjetën më pak se pjesëmarrësit në komunitetet rurale. Casiraghi tha se ishte plotësisht i tronditur nga kjo shifër sepse ai supozoi se fazat hënore do të preknin vetëm njerëzit në komunitetet rurale.
Pas mbledhjes së të dhënave të gjumit nga komunitetet Toba / Qom, studiuesit krahasuan rezultatet e tyre me të dhënat e gjumit të mbledhura nga 464 studentë në Seattle dhe gjetën të njëjtin model gjumi.
Cili është saktësisht shkaku – ende nuk e dimë.
Për njerëzit që kanë probleme me gjumin, de la Iglesia rekomandoi shmangien e dritave dhe ekraneve të ndritshme gjatë orëve të mbrëmjes, veçanërisht në netët që vijnë para hënës së plotë kur “shumica e njerëzve predispozojnë të kenë një fillim të vonuar të gjumit dhe një gjumë më të shkurtër”.
