Ulet sërish numri i viktimave nga koronavirusi në Itali në 24 orët e fundit, duke rikthyer qetësinë në një nga vendet më të goditura europiane nga pandemia.
Emergjencat Civile raportojnë se në ditën e fundit u regjistruan 70 viktima të tjera nga Covid-19, krahasuar me 117 që ishin një ditë më parë. Deri në këto momente, që nga fillimi i pandemisë në vendin fqinj kanë humbur jetën 33,142 persona.
Gjithashtu është stabilizuar dhe kurba e personave të rinj të infektuar. Autoritetet raportojnë 593 raste të reja, gjysma e të cilëve janë në Lombardi.
Edhe numri i pacientëve në kujdesit intensiv është në rënie, me 489 të shtruar, 16 më pak se dje.
Gjithsej, janë 7 379 pacientë të shtruar në spital me simptoma të COVID-19, me një rënie prej 350 në krahasim me ditën e djeshme, ndërsa ata që janë në izolimin në shtëpi janë 40 118, me një rënie prej 2 614 në krahasim me ditën e djeshme.
Tashmë me qetësimin e situatës autoritetet po mendojnë lehtësimin e mëtejshëm të masave dhe lombardët pritet të kenë mundësinë të dalin nga province duke filluar nga 3 qershori.
