Autoritetet italiane të shëndetësisë njoftuan se vaksina kundër koronavirusit e AstraZenecas duhet t’u jepet vetëm personave nën 55 vjeç. Agjencia italiane e Barnave, Aifa, tha se iu duheshin më shumë të dhëna para se ta autorizojnë atë për të moshuarit.
“Në pritje të studimeve të mëtejshme, treguesit në lidhje me vaksinën AstraZeneca mbeten preferenciale për popullatën midis 18 dhe 55 vjeç dhe pa sëmundje të rënda”, njoftoi Aifa.
Autoritetet do të fillojnë të administrojnë fillimisht vaksinën tek mësuesit e shkollës, forcat e ushtrisë dhe policisë, personeli i burgut dhe të burgosurit.
Njerëzit mbi 55 vjeç, veçanërisht ata mbi 80 dhe më të rrezikuarit, do të marrin vaksinat e vaksinës Pfizer ose Moderna.
Ky është zhvillimi i fundit nga një vend i BE-së që miraton kufizime të tilla për këtë vaksinë duke e justifikuar me efikasitetin e pamjaftueshëm të saj për të moshuarit. Franca, Gjermania dhe Austria tashmë kanë rekomanduar që ajo të kufizohet vetëm nën moshën 65 vjeç.
Ndërkaq, autoritetet zvicerane kanë deklaruar se të dhënat për vaksinën AstraZeneca nuk janë të mjaftueshme për të dhënë dritën jeshile, për përdorimin e saj.
Rregullatori i BE-së për barnat ka aprovuar vaksinën Oxford-AstraZeneca për të gjithë të rriturit, por i takon secilit anëtar të përcaktojë politikën e tij të përdorimit.
