Izraeli ka sulmuar bazat ushtarake të Iranit në shenjë hakmarrje kundër sulmeve të Teheranit ndaj Izraelit, sulmi i fundit në konfliktin e përshkallëzuar midis dy rivalëve. Disa orë më vonë ushtria izraelite tha se sulmet e saj ishin përfunduar dhe objektivat e saj ishin arritur, por një agjenci zyrtare iraniane e lajmeve u zotua për një “reagim proporcional” ndaj lëvizjeve izraelite kundër Teheranit.
Mediat iraniane raportuan shpërthime të shumta gjatë disa orëve në kryeqytet dhe në bazat ushtarake aty pranë, duke filluar pak pas orës 2 të mëngjesit me orën lokale. Irani tha se sistemi i tij i mbrojtjes ajrore kundërshtoi me sukses sulmet e Izraelit ndaj objektivave ushtarake në provincat e Teheranit, Khuzestanit dhe Ilamit me “dëmtime të kufizuara” në disa vende.
“Në përgjigje të sulmeve të vazhdueshme prej muajsh të regjimit në Iran kundër shtetit të Izraelit – tani forcat e mbrojtjes së Izraelit po kryejnë sulme të sakta ndaj objektivave ushtarake në Iran”, tha ushtria izraelite në një deklaratë duke njoftuar sulmin.
Zëdhënësi i IDF-së shtoi se, “si çdo vend tjetër sovran në botë, shteti i Izraelit ka të drejtë dhe detyrë të përgjigjet”.
Izraeli tha se kryeministri Benjamin Netanyahu dhe ministri i Mbrojtjes Yoav Gallant po ndiqnin nga afër operacionin e sulmit të Iranit në qendrën e komandës dhe kontrollit të ushtrisë në Tel Aviv të shtunën. Ushtria izraelite publikoi një video tjetër që tregon shefin e Shtabit të Përgjithshëm Herzi Halevi me oficerët e ushtrisë që monitorojnë sulmet izraelite në Iran.
Lindja e Mesme ka qenë në pritje të hakmarrjes së Izraelit për një breshëri raketash balistike të kryer nga Irani më 1 tetor, në të cilën rreth 200 raketa u lëshuan në Izrael dhe një person u vra në Bregun Perëndimor.
Tensionet midis rivalëve të mëdhenj Izraeli dhe Irani janë përshkallëzuar që kur Hamasi, grupi militant palestinez i mbështetur nga Irani me bazë në Gaza, sulmoi Izraelin më 7 tetor 2023. Hamasi është mbështetur nga militantët e Hezbollahut me bazë në Liban, të mbështetur edhe nga Irani.
Frika se Irani dhe SHBA-ja do të tërhiqen në një luftë rajonale janë rritur me intensifikimin e sulmit të Izraelit ndaj Hezbollahut që nga muaji i kaluar, duke përfshirë sulmet ajrore në kryeqytetin libanez Bejrut dhe një operacion tokësor, si dhe luftën e tij njëvjeçare në Gaza.
