Juventusi i qëndroi besnik planit dhe nuk e lejoi veten të ndikohej nga humbja kundër Empolit. Bardhezinjtë nuk e kthyen Miralem Pjanic, nuk investuan në një portier të ri apo numër 9. Nëse është një vendim i mirë apo i keq, vetëm sezoni i ri do ta tregojë. Pyetja interesante, megjithatë, është përfshirja e blerjeve të kësaj vere në rrugën e rritjes së Juves.
ERË E RE – Në epokën e Cristiano Ronaldos, nga 2018 deri më 2020, klubi bardhezi kishte ndërhyrë me vendosmëri në merkato. Ai kishte shpenzuar shumë për transferimet dhe huazimet. Për të përballuar nevojat e tij, Juventusi kishte përpunuar operacione komplekse për të siguruar fitime kapitale.
Detyrimet e krijuara nga ato vite shpenzimesh, nga pagat XL dhe nga tkurrjet e të ardhurave për shkak të Covid-19 e kanë çuar Juven në një ndryshim të strategjisë. “Zonja e Vjetër” mori Locatelli, Moise Kean, Kaio Jorge dhe Mohamed Ihattaren (e dërgoi këtë të fundit në huazim te Sampdoria).
Përkatësisht një 1998-sh, 2000-sh dhe dy 2002-sha (datëlindjet) e përfundojnë portretin e merkatos së verës së Juventusit. Lojtarë të rinj për një qëllim afatmesëm. “Jo”-ja për Miralem Pjanic, një lojtar 31-vjeçar me pagë të madhe, shkon qartë në këtë drejtim.
ICARDI DHE VLAHOVIC – Icardi në këtë kontekst nuk është një emër rastësor. Lajmet për Maurito dhe Juve janë një “rutinë” e përjetshme. Në çdo sesion merkatoje, ato rishfaqen. Viti 2022 ndoshta nuk do të jetë përjashtim. Icardi dhe Juve gjithashtu kanë menduar për vitin e ardhshëm. Mauro në janar do të dijë se sa hapësirë do të ketë në sulmin joreal me Mbappe, Messi dhe Neymar… Pra, nuk përjashtohet që Juve ta marrë në huazim, me kushtet që parizienët pëlqejnë.
Klubi bardhezi brenda një viti do të duhet të vendosë nëse do ta blejë Moratën për 35 milionë euro. Në fakt, është e mundur që ato miliona të devijohen në një numër tjetër 9. Dushan Vlahovic është padyshim një kandidat. Juve është informuar vazhdimisht për gjendjen e tij, si të gjitha klubet e mëdha, dhe përfundimi i kontratës së serbit, qershor 2023, do të thotë vetëm një gjë: betejë, betejë ndërkombëtare.
