Presidenti i Turqisë, Rexhep Tajip Erdogan e quajti kryeministrin izraelit Benjamin Netanyahu “kasapin e Gazës” dhe e akuzoi atë për përhapjen e antisemitizmit në të gjithë botën.
Erdogan ka kritikuar vazhdimisht Izraelin për shkallën e vdekjes dhe shkatërrimit të shkaktuar nga përgjigjja e tij ndaj sulmit të pashembullt ndërkufitar të militantëve të Hamasit më 7 tetor. Ai e ka quajtur Izraelin një “shtet terrorist” dhe e ka quajtur Hamasin “një grup çlirimtar”.
“Netanyahu e ka shkruar tashmë emrin e tij në histori si kasapi i Gazës. Netanyahu po rrezikon sigurinë e të gjithë hebrenjve në botë duke mbështetur antisemitizmin me vrasjet që kreu në Gaza”, tha Erdogan në një fjalim në televizionin kombëtar.
Retorika e mprehtë e Erdoganit ka kërcënuar të prishë marrëdhëniet e Turqisë me Izraelin. Të dyja palët vitin e kaluar riemëruan ambasadorët pas një ndërprerjeje të gjatë 10-vjeçare.
Lufta e Gazës bëri që Izraeli të tërheqë të gjithë stafin diplomatik nga Turqia dhe vendet e tjera të rajonit si një masë paraprake sigurie. Turqia gjithashtu ka tërhequr të dërguarin e saj në Tel Aviv në shenjë proteste ndaj qasjes së Izraelit.
