Kryeministri Edi Rama reagoi në Berlin në lidhje me deklaratat kërcënuese të presidentit Ilir Meta se mund të shpërndajë parlamentin.
Rama tha se nuk i ka ndjekur deklaratat e Metës, por shtoi se ato nuk e surprizojnë.
“Nuk i kam ndjekur deklaratat e presidentit. Nuk përbëjnë asnjë surprizë. Ai ka një raport personal me rrotullimin e Hënës. Kështu që varet se ku është Hëna në momentin që flet. Parlamenti vijon punën dhe është në krye të detyrës”, tha Edi Rama.
Kreu i qeverisë përsëriti edhe nga Gjermania thirrjen drejtuar opozitës jashtëparlamentare që të ulet e të dialogojë për çështjet pezull për Kodin e Ri Zgjedhor.
Sipas tij duhet të vijohet me implementimin e ligjit dhe nisjen e punës për çështjen e identifikimit elektronik të zgjedhësve. Rama deklaroi se opozita jashtëparlamentare duhet ta harrojë se mund të bllokojë procesin.
“Shpresoj që opozita të mos humbasë kohë. Zgjedhjet janë në 25 prill. Votimi i ligjit zgjedhor është vetëm hapja e një procesi që duhet të zbatohet. Kemi dhe angazhimin për sistemin e identifikimit elektronik. Sa më shumë humbet kohë aq më shumë vonohet aplikimi. Opozita duhet ta harrojë se mund të bllokojë procesin siç ka bërë”, deklaroi Rama.
