Dy persona janë ekstraduar drejt Shqipërisë. Njëri është kapur në Itali, e tjetri në Greqi. Të dy akuzohen për veprimtari të paligjshme në lidhje me lëndët narkotike.
Gjergji Luli, 32 vjeç u ekstradua nga Italia.
“Ky shtetas ka qenë i shpallur në kërkim ndërkombëtar pasi GjKKO i ka caktuar masën e sigurisë “Arrest në burg”, për veprat penale “Prodhimi dhe shitja e narkotikëve”, “Grup i strukturuar kriminal” dhe “Kryerja e veprave nga grupi i strukturuar kriminal””, njoftoi policia.
Luli në bashkëpunim me një person tjetër ka transportuar dhe shitur kokainë për 200 mijë euro dy personave. Këta të fundit e kanë shitur drogën në Bergamo të Italisë në periudhën Mars-Nëntor 2016.
Në vitin 2017 është sekuestruar një tjetër sasi kokaine, po në Bergamo që dyshohet se ishte shitur nga Luli dhe bashkëpunëtori i tij.
Ndërsa nga Greqia u ekstradua Arben Cufe, 48 vjeç.
“Ky shtetas ka qenë i shpallur në kërkim ndërkombëtar pasi, në vitin 2019, Gjykata i ka caktuar masën e sigurisë “Arrest në burg”, për veprën penale “Trafikimi i narkotikëve”, kryer në bashkëpunim”, njoftoi policia.
Rezulton se Cufe në bashkëpunim me një person tjetër ka organizuar trafikimin e një sasie lënde narkotike në Greqi. Sasia e lëndës narkotike është transportuar në Greqi, kundrejt pagesës në euro nga 4 shtetas, të cilët janë arrestuar nga Policia.
Dy shtetasit e ekstraduar në Shqipëri iu dorëzuan Drejtorisë së Përgjithshme të Burgjeve, për veprime të mëtejshme procedurale.
