Miralem Pjanic nuk është më pjesë e projektit teknik të Barcelonës. Ish-lojtari i Romës dhe Juventusit nuk ka gjetur kurrë hapësirë nën drejtimin teknik të Ronald Koeman dhe tani po shfaqet hipoteza e kthimit në Itali. Gazeta katalanase “Sport” zbulon se Chelsea dhe Interi janë në gjurmët e boshnjakut. Mesfushori shtatshkurtër mbërriti te blaugrana-t verën e kaluar në formë shkëmbimi me Arthur, me një vlerësim prej 60 milionë euro.
Me konfirmimin e Koeman në stolin katalanas, gjithnjë e më shumë bëhet e vështirë që Pjanic të gjejë hapësirë në sezonin e ardhshëm, kështu që hipoteza e një transferimi bëhet gjithnjë e më e fortë. Megjithatë, deri më sot, formula e vetme për të kënaqur lojtarin dhe klubin do të ishte ajo e huazimit.
