“Ne jemi të gatshëm të mbështesim autoritetet italiane dhe të ofrojmë çdo mbështetje të mundshme”, deklaroi Stella Kyriakides, Komisionerja e Shëndetit në BE, që po e ndjek me vëmendje të veçantë situatën në Itali. Brenda 48 orësh Italia është ngjitur në renditjen europiane të infeksioneve për koronavirus, duke tejkaluar shumë Mbretërinë e Bashkuar (9 raste), Francë (12) dhe Gjermani (16).
Viktimat në Itali janë edhe viktimat e para europiane, duke pasur parasysh që deri tani vdekja e vetme – e regjistruar në Francë – kishte qenë ajo e një turisti kinez 80-vjeçar. Duke pasur parasysh natyrën e shpërthimit që ndodhi në Lombardi dhe Veneto, në Bruksel kanë frikë se situata do të degjenerojë në ditët në vijim, me një rritje të mundshme eksponenciale të infeksioneve. Një skenar makthi që rrezikon të ketë pasoja serioze në shëndet, por edhe në nivelin ekonomik.
Për momentin, askush nuk flet në mënyrë të qartë për ndalimin e lëvizjes së lirë të Shengenit, të cilin BE do të dëshironte ta shmangte me çdo kusht. Dhjetë ditë më parë, në përfundim të mbledhjes së jashtëzakonshme të Këshillit të Shëndetit të BE-së, të 27 ministrat kishin shkruar e zeza mbi të bardhë se ata ishin “të gatshëm për të marrë masa për udhëtimin”, por me një kusht: “Mbrojtjen e lirisë së lëvizjes brenda BE”. Ndërkohë, gjërat kanë ndryshuar në mënyrë të konsiderueshme: në atë kohë, shtetet kërkonin masa për të mbrojtur veten nga “kërcënimi” i jashtëm dhe për këtë arsye fokusi kryesor ishte në udhëtimet jo-BE. Tani që ka një shpërthim potencialisht të rëndësishëm të brendshëm, problemi për Europën është gjithashtu i brendshëm.
Për dy ditë, çështja është rikthyer në qendër të debatit në Itali, të ngritur nga disa figura të opozitës. “Për momentin ne nuk mund të përjashtojmë që ndonjë vend, mbase midis atyre që janë në kufi me Italinë, e bën një kërkesë të tillë, – shpjegon një burim i BE, – por kujdes: në vend se të mbrosh Italinë, do të ishte një veprim për ta izoluar atë”.
Tani për tani, çdo fjalim i tillë konsiderohet i parakohshëm. Gjithçka do të varet nga evolucioni i situatës. Sigurisht që në Bruksel ekziston një shqetësim i konsiderueshëm për çdo pasojë ekonomike: Italia mbetet në fund të grafikut të rritjes dhe një ndalesë e mundshme e aktiviteteve të prodhimit në zonat më dinamike të vendit do të përfundonte duke pasur një ndikim jashtëzakonisht negativ edhe në PBB.
