Pas dy ditësh negociatash intensive, është arritur një marrëveshje për targat mes delegacioneve të Serbisë dhe Kosovës në Bruksel. Lajmin e ka dhënë përfaqësuesi special i BE-së për dialogun Kosovë-Beograd, Miroslav Lajçak, në Twitter, ndërsa falënderon dy përfaqësuesit e Kosovës dhe Serbisë.
“Ne kemi një marrëveshje! Pas dy ditësh negociatash intensive, një marrëveshje për de-përshkallëzimin dhe rrugën përpara sapo është arritur. Falënderoj Besnik Bislimin dhe Petar Petkoviçin për gatishmërinë e tyre për të negociuar dhe pajtuar për të mirën e njerëzve”.
Të dy palët kanë rënë dakord në këto pika:
Forcat speciale në pikat kufitare të Jarinjës dhe Bërnjakut do të largohen paralelisht me bllokadën e rrugëve duke nisur nga 2 tetori, ora 8:00. Forcat e KFOR-it do të vendosen në këto pika kufitare para largimeve simultane dhe do të qëndrojnë aty për rreth dy javë.
Nga data 4 tetor, do të zbatohet regjimi i etiketave në targat e dy vendeve, siç është rënë dakord në dialogun mes dy shteteve të ndërmjetësuar nga BE, deri sa të arrihet një zgjidhje e përhershme.
Do të ngrihet një grup pune me përfaqësues të BE, Prishtinës dhe Beogradit që do të punojë për të gjetur një zgjidhje të përhershme për targat e mjeteve, bazuar në standardet dhe praktiket e BE. Takimi i parë i këtij grupi do të zhvillohet më 21 tetor 2021 në Bruksel. Brenda gjashtë muajsh nga takimi i parë, grupi i punës do të paraqesë gjetjet e para për një zgjidhje të përhershme.
We have a deal! After two days of intense negotiations, an agreement on de-escalation and the way forward has just been reached. I thank Besnik Bislimi and Petar Petkovic for their readiness to negotiate and agree for the good of the people. pic.twitter.com/OuhuUWvuG0
— Miroslav Lajčák (@MiroslavLajcak) September 30, 2021
