Kryerabini hebre në Shqipëri, Yoel Kaplan, po lufton në Gaza si ushtar i Izraelit.
Rabini Kaplan, i cili është gjithashtu një oficer izraelit, u kthye në Izrael pas 7 tetorit menjëherë pas sulmit të Hamasit.
Organizata pro palestineze “Palestina e Lirë” ka kërkuar nga kryeministri Edi Rama që Yoel Kaplan të mos shkelë më në Shqipëri.
Sakaq, një video që shfaq Kaplan në Gaza u postua në rrjetet sociale nga një faqe e komunitetit hebre të hënën, por nuk është saktësisht e qartë se kur është marrë.
Rosh Chodesh Elul in Gaza: Rabbi Yoel Kaplan, Chabad emissary in Albania, who returned to Israel after October 7 and has been recruited since the beginning of the war, blowing a shofar for the fighters. pic.twitter.com/k54mNG0D1s
— 🔯🇮🇱The Chosen 🇮🇱🔯 (@yatircohen) September 3, 2024
“Palestina e Lirë shpreh indinjatën e thellë për lajmin se Yoel Kaplan, kryerabini i Shqipërisë, i emëruar nga qeveria e Berishës në vitin 2011, ka veshur uniformën e Forcave të Mbrojtjes të Izraelit (IDF) dhe po merr pjesë aktive në gjenocidin kundër Populli palestinez në Gaza që nga 7 tetori 2023.
I bëjmë thirrje qeverisë së Edi Ramës të largojë menjëherë Kaplanin nga të gjitha detyrat fetare të komunitetin hebre në Shqipëri dhe ta shpallë atë persona non grata. Gjithashtu, i bëjmë thirrje komunitetit hebre në Shqipëri që të distancohet nga ky individ dhe veprimet e tij të dënueshme.
Veprime të tilla jo vetëm që njollosin pozitën e udhëheqësit fetar, por komprometojnë edhe imazhin e Shqipërisë, një vend që gjatë historisë luftoi kundër shtypjes dhe për të drejtat e njeriut. Është e papranueshme përfshirja e çdo qytetari shqiptar, veçanërisht ai në pozicionin e udhëheqjes shpirtërore, në veprime që shkelin ligjin ndërkombëtar dhe kontribuojnë në vuajtjet njerëzore.
Këto veprime vijnë pasi Gjykata Ndërkombëtare e Drejtësisë (GJND) ka vendosur se prania e vazhdueshme e Izraelit në territoret e pushtuara palestineze është e paligjshme dhe duhet të përfundojë. Vendimi i GJND-së nënvizon paligjshmërinë e mbështetjes së çdo veprimi që përjetëson okupimin dhe dhunën kundër popullit palestinez. Është e papranueshme që çdo përfaqësues i Shqipërisë të përfshihet në krime të tilla që sfidojnë ligjin ndërkombëtar dhe të drejtat e njeriut.
Ne qëndrojmë në solidaritet me popullin palestinez dhe u bëjmë thirrje të gjitha komuniteteve që të refuzojnë bashkëpunimin në krimet kundër njerëzimit. Shqipëria duhet të riafirmojë angazhimin e saj për drejtësinë, paqen dhe parimet e së drejtës ndërkombëtare”, thuhet në reagimin e shoqatës Palestina e Lirë.
Kaplan u emërua kryerabin nga qeveria shqiptare në vitin 2010, ndërsa një pjesë hebre të vendit dolën kundër emërimit të tij.
