Për herë të parë pas 7 dekadash është kurorëzuar një monark i ri në Britaninë e Madhe. Arqipeshkvi i Kanterbërit vendosi mbi kokën e Mbretit Charles III kurorën e Shën Eduardit, duke kulmuar kështu ceremoninë madhështore të kurorëzimit.
Ceremonia e zhvilluar në Abacinë e “Westminster” u zhvillua në kushte të rrepta sigurie dhe me pompozitetin që i takon kurorëzimit të një prej mbretërive më jetëgjata në botë.
“Zoti e ruajt Mbretin”, ishte thirrja e kryepeshkopit dhe e kongregacionit pasi vendosi kurorën e Shën Eduardit në kokën e Mbretit.
Këmbanat e abacisë bien, boritë dhe të shtënat me armë dëgjohen në të gjithë Mbretërinë e Bashkuar.
Pas vendosjes së kurorës, përshëndetje me të shtëna armësh u dëgjuan nga 13 qytete të ndryshme të mbretërisë, përfshi Edinburgun e Skocisë, Kardifin e Uellsit dhe Belfastin e Irlandës së Veriut.
Ceremonia kryesore me të shtëna armësh u realizua në Kullën e Londrës, ndërsa kambanat e Abacisë së “Westminster” u dëgjuan të binin për të festuar momentin historik.
Detaje:
-Charles III dhe Camilla kurorëzohen Mbret dhe Mbretëreshë në një ceremoni plot muzikë dhe simbolika brenda Westminster Abbey.
-Mbreti Charles III u betua, u vajos me vaj të shenjtë, përpara se të vendosej mbi kokën e tij kurora e Shën Eduardit.
-Camilla u kurorëzua me kurorën e Mbretëreshës Mari në një ceremoni të ngjashme disa momente më vonë.
-Rreth 2,200 njerëz, duke përfshirë familjen mbretërore, të famshëm, liderë fetarë dhe krerët e shtetit, janë të pranishëm.
-Mijëra njerëz janë rreshtuar në rrugë dhe atmosferën e festës duket se sapo ka nisur.
