Shefi i Politikës së Jashtme të BE-së, Josep Borrell ka reaguar sërish lidhur me situatën e tensionuar në veri të Kosovës. Ai ka kritikuar qeverinë e Prishtinës për arrestimet e reja ndaj të dyshuarve për dhunë ndaj KFOR-it dhe për një marshim të Forcës së Sigurisë së Kosovës në Mitrovicën jugore. Për t’u dukur si “i balancuar” Borrell ka kritikuar edhe Serbinë, për retorikën e saj nxitëse.
“Shumë i alarmuar për situatën në veri të Kosovës: me arrestimet jashtëgjyqësore të serbëve dhe marshimin e Forcës së Sigurisë së Kosovës në Mitrovicën jugore; përcjellë nga një retorikë e ashpër nga Serbia”, – ka shkruar Borrell i cili ka shtuar se ky tensionim në rritje, nuk do të tolerohet.
“Pavarësisht takimit për krizën, tensionimi po vazhdon dhe po bëhet më i rrezikshëm. Nuk do ta tolerojmë”, – ka shkruar Borrell.
Por kryeministri i Kosovës, Albin Kurti ka reaguar pas deklaratave të shefit për politikë të jashtme të BE-së duke u shprehur se ky është dezinformim i rrezikshëm dhe do të përhapë panik.
“Stërvitjet e sotme nga Regjimenti i III i FSK të Kosovës në Mitrovicën e Jugut janë një aktivitet rutinë, i planifikuar çdo vit, për të cilin KFOR-i ishte plotësisht i informuar. Ai përbëhej nga 215 ushtarë që shkonin nga garnizoni “Minatori” në Frashër dhe ktheheshin. Dezinformimi është i rrezikshëm dhe i papranueshëm” – shkruan Kurti që përgjigjet edhe për arrestimet e serbëve.
“Bazuar në provat e shumta dhe në përputhje me Kodin e Procedurës Penale dhe të drejtat e procesit të rregullt ligjor, Policia ka arrestuar një person në N. Mitrovicë për sulmon ndaj KFOR në Zveçan më 29 maj. Si kryeministër i një shteti demokratik nuk kam asnjë përfshirje në hetimet dhe arrestimet.
Përhapja e panikut dhe pretendimeve të rreme vetëm ndez tensionet dhe ndihmon ata që kërkojnë t’i përshkallëzojnë ato. Një thirrje për të gjithë: ju lutemi konfirmoni burimet tuaja dhe prisni informacione zyrtare nga institucionet e Kosovës përpara se të vendosni të angazhoheni publikisht në transmetimin e lajmeve ose parashikimin e ngjarjeve”, shkruan Kurti në Twitter.
