Kryeministri në detyrë i Kosovës Albin Kurti ka hedhur idenë e një takimi të ngushtë mes krerëve më të lartë të Shqipërisë dhe Kosovës në një kohë që mbledhjet e përbashkëta të dy qeverive nuk po bëhen për shkak të pandemisë Covid-19. Në një intervistë për gazetarin Lutfi Dervishi në emisionin Përballë Kurti tha se për këtë iniciativë nuk ka marrë asnjë përgjigje nga pala shqiptare.
“Edhe në këtë kohë të pandemisë mund të kishim bërë më shumë. Ekzistonte një iniciativë për të cilën edhe Presidenti i Kosovës ishte dakord edhe Kryeparlamentarja e Kosovës që mqs nuk po realizojmë mbledhje të përbashkëta të dy qeverive siç e kishim menduar për në fund të marsit kemi mundur shumë kollaj që të kemi një takim prej gjashtë vetave, Rama, Meta, Ruçi, Thaçi, Osmani dhe unë. Dhe mendoj që tek çështja e kombit nuk duhet të ndahemi ekzekutiv dhe legjislativ, tek çështja e demokracisë këto ndahen. Dhe një takim prej gjashtë vetave, kudo o në Shqipëri o në Kosovë do të ishte besoj shumë i dobishëm për dy vendet tona dhe për kombin shqiptar por nuk mora një përgjigje në këtë rast. Dhe mendoj që duhet të intensifikojmë bashkëpunimin, mundësitë janë më të mëdha. Shpresoj që kur te zbutet pak kjo pandemi do të mund të kompensojë diçka nga koha e humbur.”
Sipas kryeministrit në detyrë të Kosovës, qeveritë e dy vendeve duhet të rrisin më shumë bashkëpunimin mes tyre, veçanërisht në vende të rëndësisë të lartë, siç është dhe forumi i vendeve të Ballkanit Perëndimor.
“Besoj që si Kryeministër i Republikës së Kosovës dhe zoti Rama si Kryeministër i Shqipërisë, ne të dy në të gjitha këto forumet e Ballkanit Perëndimor duhet të koordinohemi më shumë seç po bëjmë, pasi të kalojë kjo pandemia e koronavirusit ne mund të kemi një rol shumë më të madh për kombin shqiptar në përgjithësi seç po e bëjmë aktualisht. Mos harroni se nga 6 vende të Ballkanit Perëndimor Shqipëria dhe Kosova bëjnë një të tretën, vetëm edhe një shtet tjetër pot ë jetë me ne, ne bëjmë gjysmën. Shpesh herë jemi katër shtete, sepse edhe Mali I Zi dhe Maqedonia është me ne.” – tha Kurti në Përballë.
