Ka ndërruar jetë legjenda e futbollit gjerman, Fraz Beckenbauer. Lajmi u bë i ditur të hënën pasdite, ndërsa thuhet se Franz Beckenbauer vdiq të dielën në moshën 78-vjeçare. Ai ishte i rrethuar nga familja e tij kur ndërroi jetë.
Tashmë Gjermania i thotë lamtumirë futbollistit më të madh të të gjitha kohërave.
Për të gjithë “Der Kaiser”, ai ishte kampion bote si lojtar në 1974 dhe si trajner në 1990, si dhe kampion dhe fitues i Kupës së Europës me FC Bayern.
Beckenbauer kishte vite që ishte tërhequr nga jeta publike. Kjo, për shkak të vdekjes së djalit të tij Stefan në vitin 2015 e sidomos pas akuzave për ryshfete që kishte marrë në periudhën kur ai ishte drejtues i Komitetit Organizator të Botërorit 2006.
Gjendja e tij shëndetësore ishte përkeqësuar ndjeshëm në vitet e fundit. Ai kishte pasur probleme me syrin, më pas një operacion në zemër të shoqëruar nga Parkinsoni dhe demenca e pjesshme.
Ai kishte vuajtur shumë vitet e fundit për shkak të këtyre situatave shëndetësore dhe nuk kishte marrë pjesë në asnjë aktivitet publik, për të shmangur prishjen e imazhit që kishte krijuar gjatë një karriere shumë të suksesshme.
