Gjykata e lartë e Nepalit urdhëroi lirimin nga burgu të Charles Sobhraj, vrasësit serial famëkeq francez që frymëzoi edhe serialin televiziv të nominuar për disa çmime prestigjioze, “Gjarpri”.
Vendimi sipas Gjykatës erdhi për shkak të moshës dhe shëndetit të tij.
Sobhraj, 78 vjeç, kishte vuajtur një dënim të përjetshëm në një burg në periferi të Katmandu të Bhaktapur për vrasjen e dy turistëve në vitin 1975, por shumë nga vrasjet e tij të supozuara mbeten të pazbardhura. Sobhraj vuan nga një sëmundje e zemrës dhe ka nevojë për një operacion.
I lindur në Saigon, një zonë e administruar nga Franca, Sobhraj u burgos fillimisht në Paris në 1963 për vjedhje, por vazhdoi të akuzohej për kryerjen e krimeve në një listë vendesh: Francë, Greqi, Turqi, Iran, Afganistan, Pakistan, Nepal, Indi, Tajlandë dhe Malajzi. Ai gjithashtu u arratis nga burgu në disa vende dhe prirja e tij për t’iu shmangur autoriteteve i dha pseudonimin “Gjarpri”.
Para se të dënohej në Katmandu, Sobhraj kishte kaluar tashmë njëzet vjet burg në Indi për helmimin e turistëve francezë në një autobus.
Gjatë kësaj kohe ai ka arritur të arratiset për pak kohë nga burgu duke droguar gardianët e burgut. Ai më vonë pretendoi se arratisja ishte një dredhi për të zgjatur dënimin e tij dhe për të shmangur ekstradimin në Tajlandë, ku kërkohej për pesë vrasje të tjera.
Sipas biografëve të tij, Sobhraj përfundimisht pranoi të paktën 12 vrasje midis viteve 1972 dhe 1976 dhe la të tjera pezull përpara se të tërhiqte rrëfimet përpara rasteve të tjera gjyqësore. Numri i tij i vërtetë i viktimave nuk dihet.
Drama e BBC/Netflix e vitit 2021 e quajtur “Gjarpri” bazohet në historinë e vrasjeve të supozuara të Sobhraj. Tregon se si për vite me radhë, ai i shmangej ligjit në të gjithë Azinë, ndërsa dyshohet se drogonte, grabiste dhe vriste turistët me çantë shpine përgjatë të ashtuquajturës “shtegu hipi”.
