Kryeministri Edi Rama është shprehur se është i frymëzuar nga nxënësit ekselentë të gjimnazeve.
Komentet Rama i bëri në ceremoninë e dhënies së ‘Medaljes së Artë’ për nxënësit që kanë përfunduar gjimnazin me nota 10-a absolute.
Rama tha se e di vështirësitë që ata kanë hasur, pasi sipas tij, është e vështirë në botën e sotme që të jesh një hero pozitiv, në një kohë që kudo promovohen heronjtë negative.
“Kemi njëqind e 88 medalje për të ndarë. Kështu që unë nuk do e hap dosjen ku kam fjalimin dhe ju premtoj se nuk do iu jap asnjë këshillë, sepse e kujtoj gjithmonë kohën që kam qenë si ju dhe kur gjendesha në bombardimin e prindërve, flisja me vete dhe i thoja vetes ‘betohu që kurrë nuk do e harrosh se kur të bëhesh sa këta, nuk do bësh si këta dhe nuk do japësh këshilla të pakërkuara.
Gjithsesi, meqë ju jeni këtu, do të kërkoj ndjesë që do përsëris të njëjtën gjë, që më vjen shumë natyrshëm që kam nderin e veçantë të jem për hir të detyrës në këtë ceremoni. Është nder i veçantë që të kesh të mbledhur Brenda 4 mureve të gjithë ajkën e ekselencës dhe të kesh fatin t’i shohësh në sy gjithë heronjtë e një kohe, që nuk është e lehtë të jesh hero pozitiv dhe ku hapësira e komunikimit, përfshi rrjetet sociale është e mbushur me heronj negativ.
Nga ju ka vajza e djem që janë rritur në familje me halle. Ka vajza e djem që mund të kenë vetëm njërin nga prindërit në punë. Më frymëzoni. Kur mendoj ato që thashë dhe kur mendoj se jeni në majë të një arritjeje të parë të historisë tuaj, për të marrë medaljen e artë, duke refuzuar çdo lloj justifikimi për çdo lloj vështirësie, unë them me vete se përderisa ju ja keni dalë edhe unë mund t’ja dal”, tha Rama
