Narko-trafikantët ishin më të shpejtë se ligji. Ose është një përpjekje për t’i shpëtuar presionit duke ofruar “koka”.
“Escorpiones”, një bandë e lidhur me kartelin e Gjirit, gjeti vrasësit e dyshuar të dy amerikanëve në një rrugë në Matamoros, Meksikë. Dhe ata kërkuan falje përmes një letre për atë që ndodhi. Është shumë herët për të thënë nëse kjo është e vërteta në një histori që ka ende shumë për të treguar.
Por le ta fillojmë nga e premtja, kur katër afrikano-amerikanë nga Karolina e Jugut hyjnë në qytet me një furgon.
Ata nuk shkojnë shumë larg, automjeti i tyre është bllokuar nga persona të armatosur që kanë hapur zjarr. Një video tregon banditët duke shtyrë një grua në një kamionçinë dhe duke tërhequr zvarrë një trup.
Rrëmbimi tërheq vëmendjen, FBI ofron një shpërblim prej 50,000 dollarë dhe familjet e të zhdukurve kërkojnë ndihmë.
Sipas versionit të tyre, të katër ishin në Matamoros për arsye mjekësore, një praktikë mjaft e zakonshme për amerikanët. Trajtimet kushtojnë më pak, por ky është vetëm fillimi i dramës.
Policia meksikane nis një aksion, ka një ndalim të një personi të dyshimtë. Hetuesit spekulojnë se personat e armatosur ngatërruan amerikanët me trafikantë (rivalë) të emigrantëve të paligjshëm haitianë.
Një praktikë, që gangsterët mund ta “mbyllin si çështje”, ose të imponojnë paratë e lirimit.
Flitet për rolin e një bosi, i njohur si Kena ose Cyclon 19, pjesë e kartelit të Gjirit. Ka një emër për të kërkuar, një profil për të përshkruar. Lajmi është më i shpejtë, mobilizimi çon në një pikë kthese.
Tragjike. Dy nga pengjet, Shaeed Woodward dhe Zindell Brown, janë gjetur të pajetë, njëri është plagosur dhe i katërti është në gjendje të mirë.
Ndërkohë, lajmet po dalin nga SHBA: të vrarët, Woodwar dhe Brown, kishin precedentë droge. Në këtë pikë hetuesit nuk përjashtojnë hipoteza të tjera – përfshirë atë të një konflikti – ndërkohë që familjarët këmbëngulin për vizita për qëllime shëndetësore.
Sipas traditës, versionet ndërthuren, duke rritur konfuzionin. Megjithatë, kthesa e dytë arrin. Ndoshta e parashikueshme.
Karteli lëviz, merr komandën e pritës dhe e vë atë në dispozicion të autoriteteve në mënyrë spektakolare.
Të pestë janë të lidhur me duart pas shpine, pranë një tabele që shpjegon “Los Escorpiones”.
Mesazhi është surreal ose real, në varësi të këndvështrimit të secilit. Banditët thonë se duan paqe dhe qetësi në Matamoros, kërkojnë falje për pasojat, saktësojnë se kanë ndëshkuar elementët që vepruan në mënyrë autonome, duke mos iu bindur urdhrave dhe premtojnë një linjë të ashpër edhe në të ardhmen.
“Ne kemi vendosur të dorëzojmë ata që ishin të përfshirë drejtpërdrejt dhe përgjegjës në ngjarje, të cilët në çdo kohë vepruan nën vendimmarrjen e tyre dhe mungesë disipline,” thuhet në letrën e drejtuesve te kartelit te drogës, duke shtuar se ata individë kishin shkelur rregullat e bandës, të cilat përfshijnë “respektimin e jetës dhe mirëqenies së të pafajshmëve”.
