Mediat italiane shkruajnë se kryeministrja italiane Giorgia Meloni kërkon që të blejë një vilë private në Shqipëri, me pishinë, kopsht privat dhe me pamje nga deti.
Është gazeta “Il Foglio” që ka dhënë lajmin i pari duke shkruar se marrëdhëniet mes dy Shqipërisë dhe Italisë mund të intensifikohen më tej, nëse dëshira e Melonit realizohet.
“Meloni ia ka vënë syrin një vile në një resort në Shqipëri”, shkruan media italiane, ndërsa janë mësuar edhe më tepër detaje për zonën ku kryeministria italiane dëshiron që të pushojë në Shqipëri.
Non solo migranti, Meloni ha messo gli occhi su una villetta in un resort in Albania. Il Cav. comprò una villa a Lampedusa, la premier è attrata dalla costa di Valona. Così i rapporti fra Roma e Tirana si fanno sempre più solidi. Di @SimoCanettieri https://t.co/5KnJLZ61VQ
— Il Foglio (@ilfoglio_it) August 15, 2024
Sipas mediave italiane, bëhet fjalë për një vilë në zonën e lakmuar të Palasës, ku çmimi i saj shkon në qindra mijëra euro.
Meloni ishte një vit më parë në Vlorë për të kaluar pushimet e saj ku ndenji për tre ditë në rezidencën qeveritare shqiptare, ku u takua edhe me kryeministrin Edi Rama.
Por mesa duket Meloni është mrekulluar nga bukuria e jugut të Shqipërisë, duke kërkuar që të ketë edhe pronën e saj.
Mediat italiane shkruajnë po ashtu se Meloni prej kohësh ishte në kërkim të një investimi të ri, dhe se ëndrra e saj ishte një vilë me pamje nga deti, me pishinë private dhe kopsht.
“Investimi nuk do të ishte vetëm ekonomik, por edhe, mbi të gjitha, politik. Njësoj siç bëri Silvio Berlusconi kur bleu vilën në Lampedusa për të qenë më afër banorëve të ishullit dhe për të mos i bërë ata të ndihen vetëm. Meloni është në kontakt të ngushtë me Shqipërinë duke pasur parasysh projektin për ndërtimin e qendrave të pritjeve të emigrantëve. Një zgjedhje, nëse përfundon shitja, e cila do të “çimentojë” marrëdhënien mes Romës dhe Tiranës. Ndërkohë, përflitet se Meloni mund të shijojë disa ditë relaksi në Sardenjë, ku mund të takohet me Marina Berlusconin”, shkruan mes të tjera mediat italiane.
