Parlamenti Europian sqaroi përse u fshi nga faqja deklarata e djeshme e tre deputetëve që i kërkonin Shqipërisë miratimin sa më shpejt të marrëveshjes së 5 qershorit.
Sipas zyrës së shtypit të Parlamentit Europian, versioni i publikuar dje ishte jo përfundimtar dhe ishte hedhur në faqen e institucionit gabimisht.
Qëndrimi i firmosur prej kreut të Komisionit të Jashtëm, David McAllister, raportueses për Shqipërinë, Isabel Santos dhe kreut të delegacionit për Shqipërinë, Manolis Kefalogiannis, u ripublikua sot në faqen e Parlamentit Europian, me disa modifikime. Çfarë binte në sy ishte gjuha e zbutur në disa paragrafë.
Tonet ultimative të versionit fillestar ishin hequr dhe varianti final i deklaratës kufizohej të nënvizonte se ishte me rëndësinë për integrimin të ruhej konsensusi për reformën zgjedhore.
Edhe zyra e shtypit e Parlamentit Europian theksoi se thelbi i mesazhit të tre europarlamentarëve nuk ndryshon: marrëveshja e 5 qershorit duhet të implementohet plotësisht.
